17-anyos gipugos patrabaho sa 'casa'

CEBU - Gidakop sa mga sakop sa Criminal Intelligence and Investigation Bureau (CIIB) sa Mandaue City Police Office (MCPO) ang tulo ka mga tawo nga gireklamo sa usa ka minor de edad nga babaye kinsa mialegar nga gipugos kini sa pagpatrabaho sa casa.

Ang gidakop mao sila si Jaime Caberos Mata Jr., 24,   Freddie Torres Tagalog, 26, ug Roderick Sabellano Aquilla,   nga taga Capusoan, barangay Cambaro, dakbayan sa Mandaue.

Ang tulo ka dinakpan   gitanggong karon sa bilanggoan tungod sa reklamo nga ilang giatubang nga kalapasan sa balaod.

Nadakpan ang tulo ka mga suspetsado sa sulod sa usa ka karaoke bar sa miaging gabii sa Zone Agbate, barangay Paknaan sa maong dakbayan.

Si Inspector Alfred Ortiz ug mga kauban sa CIIB sa kapolisan sa maong dakbayan maoy naghimo sa operasyon nga miresulta sa pagkasikop sa maong mga gikatahapan.

Sa pagpakighinabi sa Banat News kang PO1 Alejo Sayson sa MCPO operation section, nasayran nga ang 17 anyos nga dalagita gikan sa lalawigan sa Negros Oriental ug gidala sa mga suspetsado sa maong lugar ug gipasaligan nga pasudlon og trabaho isip waitress sa usa ka karaoke bar sa maong dakbayan.

Sa dihang nahidangat na kini sa maong dakbayan wala kini makasulod og trabaho sa karaoke bar sanglit didto man kini dad-a sa usa ka casa nga gipundohan sa mga seksi ug batan-ong babaye.

Matud pa ni PO1 Sayson nga nakahigayon sa pag-eskapo ang biktima gikan sa casa ug misumbong kini sa kapolisan sa dakbayan nga maoy hinungdan sa pagkasikop sa tulo. – BANAT NEWS