Gwen nahiubos sa taga City hall

CEBU - Nagpabilin ang kahiubos hangtod karon ni Gobernador Gwendolyn Garcia ngadto sa mga opiyales sa Cebu City hall nga gipangulohan ni acting Mayor Michael Rama tungod sa wala nila pagtambong dihang gipanghatag sa Kapitolyo ang 134 ka mga deed of absolute sale sa 93-1 lot ngadto sa mga benepisyaryo niini niadtong miaging adlaw.

Apan bisan pa niini milaom gihapon ang gobernador nga sa sunod higayon dili na mopalta ang taga Cebu City tungod kay may lain pang hugna sa pagpanghatag sa maong mga deed of sale ngadto sa uban pang mga benepisyaryo.

Namasin ang gobernador nga sa umaabot pang mga adlaw makighiusa ra gihapon ang mga opisyal sa kagamhanan sa lalawigan ug sa dakbayan alang sa kaayohan sa tanan.

Miingon siya nga alang kaniya mas maayong kalimtan na ang mga butang nga maoy nahimong hinungdan sa pagkahiubsanay sa mga opisyal sa dakbayan ug sa lalawigan.

Tungod niini sila si Kapitan Mary Ann Delos Santos sa Lahug ug Kapitan Neda Cabrera sa barangay Luz pulos nagpasalamat sa gobernador tungod kay sinsero kini sa iyang pag-alagad sa katawhan dili lang sa probinsya kundili lakip na dinhi sa dakbayan sa Sugbu. – BANAT NEWS