Gullas supak LTO itransfer

CEBU - Si Kongresista Eduardo Gullas sa unang distrito sa Sugbu mibahad nga manginlabot siya sa isyu kun pugson ang Land Transportation Office (LTO) pagpabalhin sa laing lugar gikan sa Talisay City Hall.

Kini samtang mikabat sa 500 ka mga Talisaynon ang mipirma sa petisyon sa pagsupak nga ibalhin ang maong buhatan ngadto sa South Central Square sa barangay Lawaan I.

Usa sa mga rason sa ilang pagsupak sa maong sugyot mao ang kahasol nga masagubang unya sa mga drayber kun mahilayo na ang maong ahensya.

Ang mga mipetisyon nagkanayon nga kun gusto sa kagamhanan nga mahiduol sila sa katawhan mas labing maayo nga magpabilin ang LTO diha sa City Hall sa dakbayan kay sayon ra kining duolon sa mga mamumuhis.

Alang kanila mas labing maayo nga maedukar ang mga kadagkuan sa kagamhanan nianang gitawag nga “one stop shop” diin dili na mohagal sa kaluya ang mga magbubuhis pagpunay og pangita nianang mga opisina sa gobiyerno diin aduna silay transaksyon.

Nasayran sa mga petisyoner nga ang balhinan sa LTO mao ang edipisyo nga gipanag-iya sa MATVEL Holdings Corporation.

Ang MATVEL ug ang LTO miintra og kasabotan o Memorandum of Agreement (MOA) niadtong tuig 2007 nga librehon sa abangan ang maong ahensya sulod sa 25 ka tuig gawas sa security guard, suga ug tubig.

Apan ang LTO wala motuman sa maong MOA nga maoy hinungdan nga gikiha kini sa MATVEL   ngadto sa korte ug niadtong Nobiyembre 20, 2008 si Regional Trial Court (RTC) Judge Sylva Aguirre Padiranga miluwat og hukom nga nagmando sa LTO sa pagbalhin ngadto sa Matvel building sa daling panahon.

Apan si Kongresista Gullas miawhag kanila ni Konsehal Rodolfo Cabigas, Aaron Capala ug ex-officio member Osmundo Manreal Jr. nga mopasar og resolusyon sa pagsupak nga ibalhin ang buhatan sa LTO.

Matud ni Gullas nga unsa may kagul-an sa LTO nga diha sa City Hall libre man sila sa tanan gikan sa abang, tubig, kuryente ug security guard ug sayon ra ang transaksyon sa publiko sa maong ahensya. .

Gani iyang giawhag ang legal counsel sa LTO nga moduso og motion for reconsideration sa maong hukom sa korte.

Ang kongresista mibahad nga mopahigayon siya og usa ka congressional investigation sa higayong mabalhin gyud ang buhatan sa LTO. - BANAT NEWS