10 nataptan og HIV sa siyudad

CEBU - Napulo na ang nataptan sa Human Immunodeficiency Virus (HIV) sa dakbayan sa Sugbu sukad niadtong miaging buwan sa Enero.

Kini maoy gibutyag ni doctor Ilya Abellanosa Tac-an ang STD/HIV/AIDS coordinator sa Cebu City Health Department.

Ang labing nakapabalaka ni Doctor Tac-an niini kay sa napulo nga naka-HIV, upat niini ang napositibo sa Acquired Immune Deficiency Syndrome (AIDS).

Niingon si doctor Tac-an nga ang labing awahi nga nataptan og AIDS mao ang usa ka 25 anyos nga babaye nga nagtrabaho sa usa ka balay kahilayan sa dakbayan.

Nagtoo ang STD/HIV/AIDS coordinator nga mas daghan pa ang wala matala sa ilang buhatan nga gituuhang naka-HIV/AIDS.

“Mas daghan pa gyud kay kadto diay’ng mga commercial sex workers nga wala magpa-checkup sa atong social hygiene clinic, wala man to mamonitor nato,” sumala ni Tac-an.

Niingon si Tac-an nga sukad niadtong 1989, ang City Health Department nakatala na og 84 ka tawong nataptan og HIV.

Tungod niini nanawagan karon ang STD/HIV/AIDS coordinator ilabi na niadtong nagtrabaho sa mga night spots pagsumitir sa ilang kaugalingon sa voluntary testing.

“Gi-encourage nato kadtong dunay risky behavior nga mo-submit lang for voluntary testing kay aron atong katabangan, confidential man gihapon na,” matud ni Tac-an.

Sa pikas bahin gipadayag ni Tac-an nga nagpadayon gihapon ang ilang monitoring ug adbokasiya pagpakigbatok sa nahisgutang sakit.

Wala hinuoy kalihukan ang City Health Department karong umaabot Lunes (Disyembre 1) nga maoy giila nga World AIDS Day.

Apan gipahibawo ni Tac-an nga sila mopasiugda og “Miss Gay World AIDS Day” karong Disyembre 11 sa gabii diha sa Plaza Sugbu.

Napulo ka mga mahuyang ang gipaabot nga morampa sa maong indigay nga maoy gitahasan pagdala sa mensahe labot sa kakuyaw sa sakit nga AIDS. - BANAT NEWS