Mandaue students gipasigarbo

CEBU - Gipasigarbo ni Mayor Jonas Cortes ang mga tinun-an sa dakbayan sa Mandaue nga midaog sa techno-quiz nga ilang giapilan didto sa Baguio City niadtong Nobiyembre 22.

Ang maong indigay nga giapilan sa mga tinun-an sa pampublikong tunghaan nga gipasiugdahan sa Department of Education (DepEd) Student Technologist and Entrepreneurs of the Philippines.

Ang mga kategoriyang ilang gidag-an mao ang automotive body painting individual Contest Category; classy apron making; debut cake decoration ug uban pa.

Ang mga midaog mao sila si Juaminal Pogoy ug Mae Tamisin nga parehong naa sa third year high school; Gricher Ochea ug Jane Comaingking gikan sa 4th year high school ug mga tinun-an sa Mandaue City Science High School.

Lakip sa midaog mao sila si Elmarie Montero sa Don Gerardo L. Ouano National High School; Julie Ann Estrera sa Cabancalan National High School; Melmar Getutua sa Cabancalan National High School ug Cyril Bactong sa Tabok National High School.

Ang maong mga tinun-an gipakigkitaan si Cortes ug gipresentar ang ilang mga tropeyo ug medalya niadtong Miyerkules.

Gidayeg ni Cortes ang paningkamot sa mga tinun-an ug kini nagbunga karon og maayo.

Matud pa niya nga ang iyang administrasyon dili managana sa paghatag og suporta sa mga panginahanglan sa mga tinun-an kinsa nagtinguha sa paghatag og kadungganan sa mga Mandauehanon. - BANAT NEWS