2 tinun-an nadunggaban atol sa inom

CEBU - Duha ka mga tinun-an ang nangaangol human nangabiktima sa pagpanunggab atol sa ilang pakig-inom sa mga barkada sa managlahing lugar ning dakbayan sa miaging adlaw.

Ang nadunggaban diha sa sitio Bato, barangay Ermita mao si Jade Abadinas, 18, lumolupyo sa nahisgutang lugar gidunggab sa iyang silingan nga si RonRon Sarmiento, 19 anyos.

Base sa imbestigasyon sa Homicide Section nga samtang ang biktima naglipaylipay kauban sa iyang mga higala sa usa ka tindahan nga adunay video-karaoke dihang kalit miduol ang suspetsado ug gipuspusan ang biktima.

Ang inahan sa biktima nga nakakita sa gibuhat sa suspek daling mipakgang kaniya apan wala mopatuo ang suspek ug gidunggab hinuon kini sa gidalang kutsilyo.

Ang suspetsado daling nakaikyas human sa hitabo samtang daling gidala sa iyang amahan sa Cebu City Medical Center si Abadinas.

Sa laing bahin, usa ka tinun-an sa kolehiyo ang gidunggab sa iyang kainom diha sa ilang dapit sa sitio Panaghiusa sa Cabreros sa barangay Basak-San Nicolas.

Naangol sa ulo, dughan ug ubang parte sa kalawasan si Francis Rey Apas Labayan,24, human siya dunggaba og icepick ni Jay-Jay Ebesa nga iya ra usab nga silingan.

Ang duha uban sa mga higala gikatahong nag-inom dihang mitumaw ang panagbingkil sa duha ug miresulta sa pagpanunggab.

Bisan paman og samdan nakadagan palayo si Labayan ug misakay og motorsiklo ug miadto sa Mother and Child Hospital apan gibalhin kini sa Cebu City Medical Center aron magpatambal. - BANAT NEWS