CEBU - Ang usa sa mga kritiko sa katukuran sa South Road Properties (SRP) nga si kanhi senador John Osmeña mibali na sa iyang baruganan kalabot niini ug karon mipadayag na sa pagsuporta niini.
Gipadayag sa kanhi senador nga iyang gikalipay ang taho nga mahalin na ang SRP aron dunay magamit ang siyudad pagbayad sa dakong utang niini.
Sa pagsuwat ning balita kagahapon, nagpadayon pa ang negosasyon tali sa Filinvest Land Incorporated (FLI) ug sa kagamhanan sa dakbayan.
Ang Filinvest giingong interesado pagpalit og napulo ka ektaryang luna sa SRP gawas sa paggamit niini sa laing 40 ka ektarya pinaagi sa pagpakig-joint venture sa dakbayan.
Matud ni kanhi senador nga iyang gikalipay ang maong kalambuan aron maatiman usab ang ubang panginahanglan sa mga Sugbuanon gawas sa pagbayad sa utang.
“Lipay man gani ko aron makapuno-puno og diyutay sa dakong utang nga gisagubang sa siyudad,” nagkanayon ang kanhi senador.
Sa susamang kalambuan pabor usab siyang baligyaan ang kagamhanang probinsyal og luna diha sa SRP.
“Kanang ilang kwarta nga giusik-usikan karon mas maayo nga ibutang na diha sa SRP kay 300 ektarya gud na,” dugang pamahayag sa kanhi senador.
Ang pamahayag ni Osmeña iyang giluwatan atol sa pagbisita niini sa Cebu City Legislative Building kagahapong adlawa.
Si Osmeña nitambong sa gipahigayong necrological services sa maong building subay usab sa pagdala sa patay’ng lawas ni kanhi Cebu City Mayor Eulogio Borres Sr.
Ang kanhi senador nga nahimo usab nga mayor sa dakbayan, nihulagway sa pagkatawo ni Borres nga naglimin sa gugma ug pagserbisyo.
Nasayran nga si Borres maoy usa sa mga opisyal sa dakbayan nga nakaalagad sa siyudad sulod sa taud-taud nga katuigan.
Ang kanhi mayor namatay sa edad nga 91 anyos, gitakdang ilubong karong Domingo diha sa Queen City Memorial Gardens. - BANAT NEWS