CEBU - Nagdumili pagluwat og mga pamahayag si Mayor Avelino Gungob sa lungsod sa Consolacion kalabot sa lakang ni Gobernador Gwendolyn Garcia pagpasaka’g sumbong batok kaniya.
Daw usa kini ka ceasefire nga gipatuman sa lokal nga mga opisyal sa lungsod kalabot niining kontrobersya sa gikatahong nagpadayon ang pagpanguha og anapog gikan sa giingong quarry sa mayor diha sa barangay Danlag nga gimonitor sa Kapitolyo.
Ning bag-uhay lang usa ka dumptruck nga puno og graba ug balas gikan sa maong barangay ang gisakmit sa mga sakop sa Provincial Environment and Natural Resources Office human wala makapakita og delivery receipt ug nilapas sa Provincial Order 2008-10 nga nagdili na sa pagkubkob og mineral sa maong lugar.
Ang PNP ug AFP mipadala na og tropa sa maong dapit aron moabag sa PENRO subay sa kamandoan sa gobernador.
Si Nelson Maraño usa sa opisyal sa Consolacion nagkanayon nga ilang nahukman nga dili na lamang una sila moluwat pa og pamahayag ug subay sa mando sa mayor aron malikayan nga mas mo-grabe pa unya ang isyu karon nga panagbangi nila sa Kapitolyo.
Sa nasayran si mayor Gungob nisang-at og kaso ngadto sa buhatan sa Visayas Ombudsman batok sa mga opisyal sa PENRO ug Mines Geosciences Bureau (MGB) gumikan sa gihulagway niini nga pagpangharas kaniya sa dihang gipahunong ang iyang quarry operation diha sa Danlag niadtong miaging semana. - BANAT NEWS