Minnie O. iparang kang Gwen

CEBU - Duna nay nakita si kanhi senador John Osmeña nga iparang kang Gobernadora Gwendolyn Garcia sa umaabot nga 2010 elections.

Kini mao ang igsoon ni Mayor Tomas Osmeña nga si Minnie, kinsa tua karon nakabase sa Estados Unidos.

Nakakita ang kanhi senador og mga rason nganong gusto niini nga si Minnie maoy haom nga iparang kang Garcia pagka-gobernador.

“Maayo gyud na silang ipares (iatbang) kay parehas silang mga babaye, parehas pud ilang mga nawong nga giinartihan sa mga doctor,” sumala ni Osmeña.

Nasayran nga ang kanhi senador gihagit ni Kongresista Pablo John Garcia nga maoy moparang kaniya sa ikatulong distrito unya sa umaabot nga piniliay.

Apan kini wala hatagi og gibug-aton sa kanhi senador uban sa iyang pagpahibawo nga siya aktibo gihapong manginlabot sa politika sa Sugbu sa 2010 elections.

Partikular na niini ang pagtukod og alternatibong grupo diha sa dakbayan sa Lapu-Lapu nga makig-atbang sa administrasyon.

“If there is anything political in Cebu that I have been participating is in the formation of some sort of alternative to Radaza in Lapu-Lapu,” matud ni Osmeña.

Sa susamang kalambuan wala usab mabalaka ang kanhi senador nga wala nay Osmeña nga magpapili sa umaabot nga eleksyon tungod kay di siya makasigurong mobalik ang iyang anak nga si John-John Osmeña dinhi sa Sugbu ug subling mosalmot sa 2010 elections.

“So what? ngano ba! unsa man mi royal family nga gikinahanglan gyud nga dunay mosunod?” nagkanayon ang kanhi senador.

Una nang gipadayag ni Mayor Osmeña wala siya mabalakang wala nay Osmeña nga magpapili sa umaabot nga piniliay.

Gani ang gipahibawo ug gitudlo sa mayor nga mohulip kaniya sa 2010 elections, mao si Bise Mayor Michael Rama uban kang Joy Augustus Young isip bise mayor niini. - BANAT NEWS