Police trainee namatay sa jogging

CEBU - Namatay sulod sa tambalanan niadtong Huwebes sa kaadlawon ang usa ka sakop sa Regional Mobile Group (RMG-7) nga nag-training og scout human mawad-an og panimuot niadtong Miyerkules sa hapon human sa pag-jogging niini sa Camp Ceferino Genovla, lungsod sa Sibonga.

Ang namatay giila mao si PO1 Junrey Sanopao, 28, minyo, dunay usa ka anak, taga Burgos St., Feliciana Roxas Private sa barangay Dumlog dakbayan sa Talisay.

Wala na matabang pa sa mga doctor sa South General Hospital diha sa dakbayan sa Naga ang maong polis human malandig sa maong tambalanan sukad niadtong Nobiyembre 26.

Sa report sa RMG-7 nga nadangat sa buhatan ni PRO-7 Chief Ronald Roderos, nag-jogging niadtong adlawa si Sanopao dihang kalit lang kining nahagba ug nawad-an sa panimuot pag-abot diha sa guard house sa kampo sa RMG-7.

Mga classmate niini daling mitabang kaniya apan wala kini momata maong gidali siya og dala nila Insp. Dexter Calacar sa Dieparine Medical Clinic sa lungsod sa Sibonga.

Apan sa paglabay sa 20 minutos nga wala gihapon mabalik ang panimuot niini gibalhin siya sa South General Hospital dakbayan sa Naga.

Bisan paman sa gidapat nga tambal nakabsan gyud sa kinabuhi niadtong Huwebes sa kaadlawon ang maong polis sulod sa Intensive Care Unit (ICU) sa nahisgutang tambalanan.

Si PRO-7 Ronald Roderos miingon nga nagdumili ang kabanay sa maong polis nga ipa-awtopsiya kini dihang giadto ni Dr. Nestor Satur sa PNP Crime Laboratory 7.

Ang patay’ng lawas sa maong polis gidala na ngadto sa iyang pamilya alang sa haya diha sa Talisay.

Si Roderos nipadayag nga kabahin na sa training sa RMG-7 ang scouting nga usa ka special training sulod sa unom ka bulan apil na niini ang physical fitness test.

Ang scouts maoy gamiton sa PNP batok sa mga rebelde tungod sa ilang special training.

Bisan walay siyentipikong basehanan gikan sa awtopsiya nagduda ang pipila ka mga polis nga posibleng na-overweight si Sanopao sa iyang height nga 5”4 tungod kay miabot na ngadto sa 80 kilos ang timbang niini base sa Body Mass Index.

Mao kini ang labing unang higayon nga dunay namatay sa balatian ang usa ka polis sa training human kini madawat sa serbisyo. Ang maong polis makadawat sa tanang benepisyong angayang madawat sa usa ka sakop sa PNP.

Pipila na ka bulan ang milabay, kapin usa ka gatos ka police recruits ang gidala sa tambalanan human sa ilang pag-jogging ug nangaligo sa dagat dihang naatlan nga daghang mga bokya sa tubig. - BANAT NEWS