CEBU - Gihugtan karon sa pagpangita sa National Bureau of Investigation (NBI) ang duha ka kanhi opisyal sa kapolisan ug ang ilang mga kauban nga nalambigit sa pagdagit ug pagpatay sa usa ka barangay kapitan niadtong tuig 2003.
Si NBI Bacolod Chief Mamerto Cortez miingon nga nakig-ayuda na ang ilang buhatan sa ubang ahensiya sa kagamhanan dinhi sa nasud alang sa dinaliang pagkasikop kanila ni kanhi Bacolod police chief Vicente Ponteras ug George Bajelot.
Si Judge Mario Trinidad sa Regional Trial Court (RTC) 7 sa Guihulngan, Negros Oriental ang miluwat og mando sa pagsikop sa maong mga suspetsado.
Si Ponteras, Bajelot ug mga kauban nilang magpapatigayon nga si Manolo Escalante, Ramonito Estaneslao, Inspector Bonifer Gotas, SPO1 Nelson Grijaldo, PO1 Dennis Belandres, Richard Salazar ug Ruel Villacaña ang nag-atubang og kaso nga pagdagit ug pagpatay kang Eleuterio Salabas kinsa barangay kapitan sa barangay Pahanocoy ug sa pag-umangkon niini nga si Maximo Lomoljo ug maritime instructor Ricardo Suganob diin ang maong insidente nahitabo niadtong Agosto tuig 2003.
Base sa taho nga atol sa hitabo si Ponteras mao ang provincial director sa kapolisan ug hepe usab sa kapolisan sa dakbayan sa Bacolod si Bajelot dihang nahitabo ang maong pagpangdagit ug pagpatay sa mga biktima.
Ang patay’ng lawas ni Salabas nga dunay samad pinusilan ang napalgang nadugta na nga naglutaw sa kadagatan sa Negros ug Iloilo human sa paglabay sa 20 ka adlaw gikan sila gidagit.
Samtang ang patay’ng lawas nila ni Lomoljo ug Suganob ang napalgan usab nga naglutaw sa suba sa Dakbayan sa Bago human sa pipila ka adlaw nga nakalabay sa nahitabong panaglalis kabahin sa trapiko. - Romeo T. Limpangog (BANAT NEWS)