14 ka container van bugas gi -alerto sa costumes

CEBU - Katorse ka 20-footer container van nga puno og bugas humay nga nagkantidad og P9 milyones ang gi-hold sa Enforcement and Security Service Customs Police Division (ESS-CPD) sa Bureau of Customs - Port of Cebu tungod kay gipayuhot kini dinhi sa Sugbo gikan sa Cagayan de Oro sakay sa usa ka pribado nga barko.

 Kining maong gidaghanon mao na lamang ang nahibilin sa 17 unta ka 20-footer container van nga gipa-alerto sa ESS-CPD nga gipangulohan ni Capt. Isidro Estrera. Ang tulo ka container nakagawas na gikan sa barko.

 Si District Collector Ricardo Belmonte miisyu og duha ka Alert Order numero ESS-001-2008 ug ESS-002-2008 pinetsahan Nobiyembre 24, 2008, subay sa rekomendasyon ni Capt. Estrera.

 Ang maong kargamento, matud ni Estrera, walay permit to transport gikan sa National Food Authority ug walay certificate of loading gikan sa Bureau of Customs.

 Sumala pa ni Estrera sa dihang nahinabi sa Banat News nga kun molabaw na sa 3,000 ka sako ang i-transport nga bugas humay, nagkinahanglan kini og permit to transport gikan sa NFA.

 "If they cannot present the permit (to transport) and the certificate of loading from the Bureau of Customs, mahimo nang basis sa confiscation sa kargamento," si Estrera mipasabot.

 Si Estrera nagkanayon nga base sa intelligence report nga ilang nadawat, imported ang maong mga kargamento.

 Apan tungod kay wala kini certificate of loading gikan sa BOC, nagtuo si Estrera nga wala kini moagi sa customs sa Cagayan de Oro ug wala kini makabayad sa hustong duties and taxes.

 Ang maong mga bugas gikarga sa mga 20-footer container van numero SLIU 8303616, SLIU 8302841, SLIU 8019786, SLIU 8700470, SLIU 8011208, SLIU 8705488, SLIU 8100037, SLIU 8605180, SLIU 8020004, SLIU 8901135, SLIU 8809820, ILIU 9007440, SLIU 8702494, SLIU 8805755 nga sakay sa MV Princess of the South.

 Ang tulo ka container nga nakagawas na nagtangag sa numero SLIU 8013767, SLIU 8011430, ILIU 9013885.

Si Estrera nalipay hinuon nga nakigkooperar kanila ang Sulpicio Lines. Giklaro niya nga walay tulobagon ang maong shipping lines tungod kay usa lamang kini ka common carrier nga igo lamang gikargahan sa bugas apan wala masayod kun nakalapas ba diay kini sa balaod. - John Rey Saavedra (BANAT NEWS)