CEBU - Gibaharan sa bag-ong hepe sa kapolisan sa Talisay ang mga nagpadagan sa ilegal nga sugal,tigpayuhot sa ginadiling drugas ug ang mga kriminal nga magsakay og motorsiklo nga maoy una niyang puohon diha sa dakbayan.
Si Superintendent Henry Binas nga milingkod sa maong katungdanan niadtong Martes nagkanayon nga kining tulo ka mga suliran maoy iyang unahon pagsulbad diha sa Talisay.
Si Binas mikurtesiya kang Mayor Socrates Fernandez ug sa tsirman sa kahapsay ug kalinaw Konsehal Arturo Bas kagahapon.
Siya maoy mihulip kang Superintendent Romeo Perigo human sa tulo ka buwan nga pagkabakante sa maong puwesto diha sa Talisay.
Una mapili si Binas nga mahimong hepe sa Talisay City Police Station (TCPS), ang gihimong acting Talisay Police chief mao si Senior Inspector Jovito Canlapan.
Si Binas sa pakighinabi sa Banat News midayeg sa iyang junior officer nga si Canlapan kay maayong pagkadumala niini ang TCPS.
Iyang gisaad nga padayonon niya ang nasugdan ni Canlapan sa pagdumala niini sa TCPS apan maniid usab siya sa sitwasyon kung aduna bay angayang idugang niini.
Si Binas miawhag ngadto sa Talisaynon nga mosalig ngadto sa kapolisan ug nangayo usab siya og tabang gikan sa publiko sa pagsumpo sa kriminalidad. - Brenda D. Batuto (BANAT NEWS)