8-anyos naigo sa bala gikan sa .45 gisuwayan og pabuto

CEBU - Walo ka tuig nga batang babaye naigo sa saag nga bala gikan sa usa ka tawo nga nagtesting sa armas nga kalibre .45 didto sa barangay Dunguan dakbayan sa Danao sa milabay’ng hapon.

 Ang biktima mao si Erica, Bayo, residente sa maong dapit ug tinun-an sa elementarya.

Matud pa ni SPO4 Teofilo Deguilmo ang desk officer sa kapolisan sa Danao nga base sa ilang pasiunang imbestigasyon, samtang nagbarogbarog si Erica duol sa usa ka fish pond kuyog ang iyang higalang bata kalit lamang kini naigo sa saag nga bala.

 Sa pakisusi sa kapolisan nasayran nga usa ka Reynaldo Bayo, 36,   paryente sa biktima ug residente sa Poblacion dakbayan sa Danao ug usa ka legal nga tiggama og armas sa Danao mi-testing sa iyang hinimo nga kalibre .45.

 Matud pa ni Reynaldo nga sa dihang humana siya og gama sa maong armas nga kalibre .45 iya kining gisuwayan og pabuto tumong sa yuta apan ang bala nakaigo ug gahi nga butang hinungdan nga kini mibanda ug didto nakaigo sa bata nga si Erica Bayo.

 Si Erica nahiagum og samad pinusilan sa iyang ulo ug suwerte nga tapsing lang kini duol sa iyang tuong dalunggan hinungdan sa pagkalandig niini sa Danao District Hospital ug gibalhin sa Vicente Sotto Memorial Medical Center. – BANAT NEWS