Dialogue gisugyot tali sa mga pari ug parokyano gisugyot

CEBU - Gisugyot sa tigpamaba sa Arsidyosesis sa Sugbo Msgr. Achilles Dakay ang pagpahigayon og dialogue sa mga parokyano ug mga pari sa Parokya sa Birhen sa Regla sa Lapulapu   nga gipetisyonan sa dili mominos usa ka libo ka mga debotos tungod sa pamasangil nga pagpangurakot.

Nagtuo ang monsignor nga pinaagi sa pagpahigayon og dialogue ngadto sa mga parokyano maoy usa sa makasulbad sa maong problema human miduso og petisyon nga pirmado sa dili muminos usa ka libo ka mga debotos sa Birhen sa Regla nga nag-awhag kang Arsobispo   Ricardo Cardinal Vidal pagpabalhin sa parish priest nga si Rev. Fr. Pedro Arquillas ug lain duha pa ka mga pari nga sila si Roberto Villanueva ug Rev. Fr. Fabian Cayetano.

Gipasanginlan ang maong mga pari nga kurakot tungod kay kanunay lang kini nga mopahigayon og duha ka hugna nga pagpangolekta sa matag santos nga misa nga himoon sa katarungan nga dunay proyekto nga himoon apan nahibaw-an nga gipamalit lang kini og luhong sakyanan.

Apan gipadayag ni Dakay nga sukad kagahapon wala pa makadawat og kopya sa maong petisyon si Cardinal Vidal ug gidugang niya sa pagpasabot nga ang labing unang mohukom sa maong desisyon mao ang Missionaries of the Sacred Heart ug ang makab-ot nga hukom niini una pa aprobahan sa Cardinal.

Nunot niini gitambagan ni Dakay ang mga gipetisyonan nga mga pari nga maoy mangita og paagi pagpasiugda og dialogue pagsulbad sa maong kasungian niini tali sa mga debotos. – BANAT NEWS