CEBU - Unom ka mga dancer sa usa ka club gisikop sa kapolisan human kini maghubo atol sa ilang pasundayag didto sa Brgy. Poblacion dakbayan sa Lapulapu sa milabay'ng gabii.
Ang mga dancer nga nasikop nag-edad og 19 hangtod 26-anyos ug naggikan sa Davao, Butuan, Bukidnon ug nagkadaiyang lungsod dinhi sa lalawigan sa Sugbu.
Nasikop sila atol sa ronda nga gihimo sa The Rising Sun Angel Bar nga nahimutang sa Poblacion, Lapulapu.
Base sa pasiunang imbestigasyon sa kapolisan nasuta nga sa matag tungang gabii pipila ka mga dancer sa maong establisamento mopakita na sa ilang mga hubong kalawasan nga walay bisan unsang tabon niini.
Gumikan sa maong taho gihimoan og operasyon sa alas 11:50 sa milabay'ng gabii pinangulohan ni Lapulapu City Police Office Deputy Director for Operations Supt. Pedrillo Villamore ang maong club ug sa dihang positibo kini sa maong kalapasan gisikop dayon sa kapolisan ang mga babaye ug gidala sa buhatan sa kapolisan.
Matud pa ni Supt. Villamore kasong kalapasan sa Art. 201 ug 202 sa Revised Penal Code kon paglambigit sa mga malaw-ay nga pasundayag ang ilang ipasaka batok sa mga babaye samtang anaa pa kini nadetenir sa kapolisan sa dakbayan sa Lapulapu. – BANAT NEWS