Prebilihiyo sa tiguwang ipatuman

CEBU - Giawhag sa buhatan sa Office of the Senior Citizen’s Affairs ang mga establisamentong magpapatigayon sa pagtuman sa mga prebilihiyo sa maong sector subay sa nalatid sa balaod.

Kini gumikan sa daghang mga reklamo sa mga miyembro niini batok sa pipila ka mga balay patigayon nga wala mosunod sa Akta Republika 9257 nga maoy nagsigurong mahatagan og prebilihiyo ang mga katiguwangang sector.

Si OSCA head Guillermo “Dodong” Casinillo sa pakighinabi sa Banat News nagkanayon nga angayang sundon ang nalatid sa RA 9257 nga nagmandong may 20 porsiyentong discounts ang mga senior citizens sa pletihan; mga tambal; mga kan-anan; hotels; ug bisan na sa mga kalingawan.

“The OSCA is airing this appeal to the concerned establishments in order to avoid quarrels and misunderstandings,” asoy pang Casinillo.

Gawas sa sagad nang mga reklamo sa mga senior citizen duna pay reklamong di pare-parehas ang presyo sa mga tambal sa mga botikang ilang mapalitan ug kung duna may discounts, wala say stocks sa mga tambal nga ilang gikinahanglan.

Sa laing bahin, ang OSCA padayon sa pagpalig-on sa ilang pundok ug pinaagi sa padayong pagdawat og mga miyembro diha sa temporaryong buhatan niini sa opisina ni Konsehal Rodrigo “Bebot” Abellanosa sa Cebu City Hall.

Giawhag ni Casinillo ang mga padulong na mag-edad og 60 ug kadtong lapas na sa 60 anyos sa pagbisita sa ilang buhatan ug paglukat og senior citizen’s identification card aron magamit nila sa pagpangayo og diskwento.

Magkinahanglan ra kini og duha ka 1x1 picture colored o black and white; birth certificate o baptismal certificate ug kun wala niini bisan unsang government IDs sama sa SSS; GSIS; drivers license; voters ID; postal ID basta nagpatik sa adlaw'ng natawhan sa aplikante. – BANAT NEWS