Position letter sa DOH bahin sa firecrackers suportahan sa CH

CEBU - Gipasalig ni Cebu City Councilor Christopher Alix nga iyang suportahan ang giduso nga position paper sa Department of Health (DOH) ngadto sa kongreso

Gusto sa DOH nga ilakip sa pag-ban ang pagpanghimo og pagbaligya sa pipila ka mga firecrackers nga sagad gamiton panahon sa Pasko ug Bag-ong Tuig.

Partikular na niini ang kwitis (skyrocket), watusi, gagmay nga triangle, el diablo (rebentador) ingon man ang whistle bomb.

Ang maong mga pabuto nalakip sa listahan sa mga firecrackers nga gitugot ubos sa Akta Republika 7183 nga nagdili sa pagpanghimo ug pagbaligya sa mga powerful firecrackers.

Gipahibawo sa DOH nga kasagaran sa mga firecracker-related injuries sa nangaging katuigan nagagumikan sa paggamit sa nahisgutang mga pabuto.

Ang labing pait niini kay kadaghanan sa mga biktima giingong mga bata nga dali ra nga makapalit sa maong matang sa mga firecrackers.

Tungod niini gusto sa DOH nga maamendahan ang R.A. 7183 aron hingpit nang idili ang pagpanghimo ug pagbaligya sa nahisgutang mga pabuto.

Butang nga hugtanon nga gihangop ni Alix kinsa mao usab ang chairman sa Committee on Health sa City Council.

Matod sa konsehal nga siya mopalabang unya og resolusyon sa konseho nga magsuporta sa baruganan sa DOH.

“It’s a welcome development, tukma kaayo na nga lakang kay nagkaduol na ang Christmas season, mopalabang unya ta og resolution nga magsuporta ana,” sumala ni Alix.

Gani niingon ang konsehal nga mas labing maayo kung dunay age limit ang papaliton sa mga pabuto nga gitugot sa balaud.

Kini aron maminusan kun dili man hingpit kapugngan nga duna pay kabataan nga mabiktima sa pabuto atol sa kapaskuhan.

Karon pa lang nipahimangno nang daan si Alix ngadto sa mga Sugbuanon nga likayan ang paggamit sa mga pabuto nga makahatag og kadaut. – BANAT NEWS