Plebisito alang sa Banawa-Englis sa Marso

CEBU - Masaligon ang United Banawa-Englis Association Incorporated (UBEAI) nga mahinayon ang plebisito karung bulan sa Marso sunod tuig alang sa pagbuak sa Banawa-Englis gikan sa barangay Guadalupe ngadto na sa pagkahimong barangay.

Si Tony Dangcalan, presidente sa (UBEAI) nitug-an sa press conference kagahapon diha sa panimalay ni Kongresista Antonio Cuenco malaumon nga mahinayon ang plebisito.

Wala diha sa maong tigum si Cuenco apan si Dangcalan nagkanayon nga duha ngadto sa tulo ka semana gikan karun matapos na sa plenary sa Kongreso ang House Bill 5234 aron maduso ngadto sa Senado.

Ang Senado mao na unya ang mopapirma niini kang Presidente Gloria Macapagal Arroyo aron hingpit nang mahimong balaod.

Dugang pang Dangcalan nipasalig kanila si Cuenco nga human sa plebisito mosunod unya ang special elections.

Gibasol sa mga sakop sa UBEAI ang mga hingtungdan mga opisyal kaniadto sa dakbayan sa Sugbu dihang kaniadto pang giduso ang City Ordinance 1661 alang sa separation sa Banawa-Englis nga walay nahimo hangtud karun.

“Dunay pagsalig sa una (mga opisyal) apan kung ila pa ning gihimo kaniadto pa, kay 1996 pa gud ning City Ordinance 1661,” sumala pang Dangcalan.

Ang Banawa-Englis dunay 57 ka mga sitio ug dunay 10,800 nga registered voters matud pang Dangcalan.

Si Dangcalan nidugang ang ilang tumong ug tinguha nga mahimo nang barangay ang Banawa-Englis aron makapahimulos ang molupyo sa mga basic services tungod kay matud niya kuwang kaayo ang gihatag sa barangay Guadalupe.

Malaumon hinuon ang mga miyembro sa board sa UBEAI nga makakuha sila og suporta sa kinabag-ang molupyo tungod kay dili kini sa ilang personal nga katuyoan, padayag pang Dangcalan.

Sa dihang gipangutana si Dangcalan kung mahinayon nga mahimong barangay ang Banawa-Englis modagan ba sila sa election, matud ni Dangcalan sa pagkakaron wala sa ilang bokabolaryo apan wala niya isalikway ang posibilidad.

180 ka tawo gikalibanga sa Negros

Dul-an 200 ka mga tawo ang naapektuhan sa sakit nga diarrhea sa Negros Oriental nga miresulta sa kamatayon sa usa ka tawo.

Tungod niini nagplano ang kadagkuan sa Department of Health (DOH)-7 nga ipailawom sa calamity area ang mga lungsod sa Bindoy, Tayasan ug Ayongon sakop sa Binata District sa Negros Oriental.

Matud ni Dr. Susana Madrieta, regional Director sa DOH-7 ug Expedito Medalla sa Regional Epidemiology and Surveillance Unit (RESU-7) nagsugod niadtong Nobiyembre 21 ang pag-igo sa maong sakit diin niabot na og 180 ka mga tawo ang nalandig sa tambalanan ug usa niini ang namatay.

Matud ni Medalla nagkuha na og water samples gikan sa maong mga lungsod aron matan-aw sa laboratoryo tungod sa pagdudang posibleng diha gikan ang maong mga kagaw.

Nagpadala na usab og dugang tambal ug fluids ang DOH-7 sa maong mga lungsod aron magamit sa mga natakbuyan tungod kay sagad kamatyan sa mga biktima mao ang pagkauga sa tubig sa lawas.

Giawhag ni Madrieta ang katawhan nga wala maapektuhi sa diarrhea nga pabukalan gyud ang tubig nga ilang imnom.

Wala usab isalikway sa DOH-7 nga ilang awhagon ang lokal nga kagamhanan sa tulo ka mga lungsod nga ipaubos sa calamity area ang ilang lugar aron dunay pundo nga mapagawas nga itabang ngadto sa pamilya sa 180 ka mga tawo nga naapektuhan sa maong diarrhea. – BANAT NEWS