CEBU - Nagpatabang ang Dangerous Drugs Board (DDB) ngadto kang PNP Chief Jesus Versoza aron pangitaon ang polis nga maoy naghupot sa kaso ni kanhi Bise Gobernador John Gregory “John-John” Osmeña may kalambigitan sa pseudoephedrine.
Si DDB Undersecretary Clarence Paul Ominal nga nahinabi sa Banat News nagkanayon mipadala na sila’g suwat kang Versoza aron pangitaon si Sr. Insp. Prospero Bona, ang case officer sa kaso batok kang Osmeña labot na sa “Operation Latvia” uban sa Australian Federal Police.
Matud pa ni Oaminal nga si Bona maoy yawe sa maong kaso.
Iyang gisugyot ngadto sa DOJ nga dili nalang ipadayon ang pagsang-at og motion for reconsideration gumikan kay dili na mahimong makapresentar og bag-ong ebidensya ang prosecution panel subay sa transcript sa hearing kaniadto diha sa RTC Branch 13 sa sala ni Judge Mienrado Paredes.
Matud pang Oaminal useless na kung mopresentar sila og bag-ong ebidensya ug mas maayong i-re-file nalang ang kaso ug diha na nila idugang ang mga ebidensya tungod kay di matawag nga ‘double jeopardy’ ang mahitabo sanglit bisan makausa wala ma-arraign si Osmeña.
Giawhag ni Oaminal ang prosecution sa pagpadala og tawo ngadto sa Australia aron pakigkitaan ang Australian agents ug pangayoan og kopya sa dugang ebidensya ug dokumento sa maong kaso aron makatabang paglig-on sa bag-ong isang-at nga kaso.
Alang kang Oaminal, si Sr. Insp. Bona maoy nasayod sa tanan ug adunay igong dokumento nga maglambigit kang Osmeña tungod kay uban kini sa Australian Federal Police nga nagsunod sa maong kontrabando niadto pang 2003 hangtud nakasuhan si Osmeña niadtong 2004.
Sumala pa niini nga sa panahon nga makit-an sa PNP si Bona ila gilayon kining kuhaan og affidavit ug dalhon sa Department of Justice (DOJ) aron gamiton sa pagpasaka og bag-ong kaso batok kang Osmeña.
Nagtuo si Oaminal nga nagtago na si Bona kini tungod kay niadto pa kini nipadayag ngadto kang Kongresista Antonio Cuenco nga nameligro ang iyang seguridad.
Nasayran nga mokabat 1,500 ka kilograms nga pseudoephedrine ang nasakmit diha sa Port of Cebu niadtong Marso 5, 2004 nga giingong gisuwayan ni Osmeña pagtabon ang mga Australians nga sila si Mike Cummings ingon man Dirk Hultz, ang duha ka Australians nakombikto na didto sa ilang nasud. – BANAT NEWS