Biyudo gireklamo mamuso napusilan

CEBU - Kritikal ang kahimtang sa usa ka 46-anyos nga biyudo human pusila tungod sa pasangil nga kini maoy kusog mamuso sa kababayen-an sa ilang lugar diha sa sitio Latup barangay Calidngan siyudad sa Carcar niadtong Domingo sa alas 7:00 sa gabii.

Ang biktima nga gihulagway nga kritikal ang kahimtang sulod sa tambalanan dinhi sa dakbayan sa Sugbo sa paghimo ning balita mao si Wilson Satillas, 46, molupyo sa nahisgutang lugar.

Samtang ang suspek mao si Jason Nadela ug usa ka lalaking kauban niini nga wala pa mailhi ang pangalan pulos molupyo sa maong lugar, si Nadela giingong maguwang sa usa sa mga dalagang gibiktima ni Satillas.

Matud ni PO1 Gilmer Noval sa Carcar City Police dihang nahinabi sa Banat News naglingkod lang sulod sa ilang balay ang biktima niadtong higayuna dihang gisulong sa mga suspek og gipugos og abli ang pultahan sa balay niini ug gipusil kini sa tuong bahin sa dughan sa biktima.

Giusban pa gyud unta kini og pusil sa suspek apan nikagar na og wala makabuto ang armas ug nakahigayon pag-ibot sa sundang ang biktima ug gitigbas ang kamot sa suspek nga nagunit sa armas.

Ang mga suspek daling miikyas samtang ang biktima gidala sa tambalanan.

Matud pa sa kapulisan nasuko ang suspek sa biktima tungod sa pagpamuso niini ngadto sa iyang manghud ng babaye matag kini maligo.

Gani kagahapong adlawa gitakda unta ang husay sa barangay tali sa biktima ug sa manghod sa suspek.  (BANAT NEWS)