CEBU - Gitugtan nang makatukod og balik sa ilang mga stalls diha sa dalan M.C. Briones ning siyudad sa Sugbu ang mga sakop sa Cebu Market Vendors Development Cooperative (Cemvedco).
Kini maoy gibutyag sa chairman sa Cemvedco nga si Erwin Goc-ong, human usab niini mahinabi si acting mayor Michael Rama kagahapong adlawa.
Matud ni Goc-ong mipadayag si Rama nga andam kining moluwat og written permission nga gipangayo sa mga opisyal sa barangay Santo Niño.
Una nang gibabagan sa mga opisyal sa nahisgutang barangay nga makatukod og stalls ang mga vendors tungod kay kini walay napakitang permiso gikan sa City Hall.
Apan niining higayuna niingon si Goc-ong nga sila armado na unya og written consent gikan mismo sa buhatan sa acting mayor.
Gitataw hinoon ni Goc-ong nga dunay gipangayo nga mga kondisyones si Rama ngadto kaniya ug kini mao ang pagpakigsabot-sabot sa mga stakeholders.
Tuyo sa acting mayor niini nga walay moreklamo partikular na sa Citom ingon man sa mga tag-iya og mga tindahan diha sa nahisgutang dapit.
Apan niingon si Goc-ong nga ilang tumanon ang gipangayo sa acting mayor kanila ug posibleng ugmang adlawa ila nang kasugdan og tukod ang mga structures.
Kapin sa 40 ka mga manindahay ang gitakdang motukod og mga gagmay'ng tindahan diha sa dalan M.C. Briones diha mismo sa ilang giukupahan kaniadto nga boluntaryo nilang giguba tungod sa gihimong drainage system sa City Hall sa miaging mga buwan.
Si Kapitan Pancho Ramirez mipadayag nga iyang respetuhon kun dunay mapakitang written consent gikan sa City Hall ang Cemvedco apan di sila magduha-duha og demolish niini kung moreklamo ang mga silingang tindahan. (BANAT NEWS)