CEBU - Hanap ang kahigayunan nga dunay mahitabong joint venture tali sa kagamhanan sa dakbayan ug lalawigan sa Sugbu diha sa South Road Properties (SRP).
Kini maoy gibutyag ni acting Vice Mayor Hilario Davide III human usab mangayo og kopya ang kapitolyo sa joint venture ordinance sa siyudad tali sa Filinvest.
Gipadayag ni Davide nga ang rason niini dili ang panagbangi tali sa mga opisyal sa duha ka lokal nga kagamhanan kundili ang nalatid usab sa ordinansa.
“Ang among gisunod nga guidelines mao man ang joint venture ordinance diin ang negosasyon tali lang sa private entity,” sumala ni Davide.
Wala hinuon pugngi sa ordinansa ang usa ka lokal nga kagamhanan nga makig-alayon sa usa ka pribadong kompanya aron maoy makignegosasyon sa dakbayan.
Nasayran nga pormal nang mipadangat sa ilang interes ang kagamhanang probinsyal sa SRP pinaagi sa pagpadala niini og suwat ngadto sa city government.
Gitataw hinuon ni Capitol consultant Rory Jon Sepulveda nga sila mas interesado sa pagpalit og luna sa SRP ug dili ang pagpakig-joint venture sa siyudad.
Gani si Gobernadora Gwendolyn Garcia miduaw pa sa SRP niadtong miaging semana aron sa pagtan-aw sa luna nga ilang giplanohang paliton.
Kini mao ang napulo ka ektaryang daplin sa dagat nga giplanohan usab nga paliton sa Filinvest Land Incorporated.
Gipadayag ni Garcia nga mas nisamot ang iyang kaikag sa pagpalit og luna sa SRP human masayod nga duna nay tubig ug kuryente ang maong dapit.
Una nang gibutyag ni Sepulveda nga gusto sa Kapitolyo nga palabwan ang tanyag sa Filinvest nga moabot sa P2 bilyones aron sila maoy modaug unya sa price challenge.
Giklaro hinuon sa chairman sa Joint Venture Selection Committee nga si City Administrator Bimbo Fernandez nga dili pa makasiguro ang Kapitolyo niini.
Kini tungod kay mahimo pa nga mapalabwan sa Filinvest ang proposal unya nga iduso sa kagamhanang probinsyal. – BANAT NEWS