CEBU - Usa ka sakop sa Public Assistance and Reaction Against Crime (PARAC) ang mireklamong gidarok diha sa pultahan sa buhatan sa Talisay City Police Station kagahapon sa buntag sa usa ka lalaking nangangkong maoy tag-iya sa lote nga ilang gipuy-an diha sa sitio Salvador, barangay Tanke, Talisay.
Si Renato Borces, 36 residente sa maong lugar sa pakighinabi niini sa Banat News mitumbok sa usa ka Julius Inocencio, 33, taga sitio Kilawan sa maong barangay nga maoy midagmal kaniya.
Matud pa sa biktima mianha sa ilang balay si Inocencio uban ang usa ka polis nga si PO1 Reynaldo Hoybia ug mga wala mailhing lalaki ug gisugdan og guba ang iyang payag.
Si Borces mipasangil nga sa dihang mibabag siya dunay mipabuto og pusil hinungdan nga nanghapa silang tanan lakip na ang mga silingan.
Si Borces nangangkon nga usa siya sa sumusunod sa lote nga gitukoran karon sa ilang balay ug aduna sila'y nasang-at nga kaso niini ngadto sa korte.
Ang duha ka grupo nag-abot diha sa police station ug diha gikatahong nahitabo ang pagsukmag kaniya ni Inocencio ug wala pa kini matagbaw gituok ug gidarok-darok pa niini ang iyang ulo diha sa pultahan sa police station.
Si Borces mibahad nga moduso og kaso batok kang Inocencio tungod sa gibuhat niini ngadto kaniya.
Apan sa iyang bahin, si Inocencio mireklamo usab batok kang Borces ug mipasangil nga gipusil siya sa reklamante apan hangtod sa oras niining pagbalita wala pa mobalik si Inocencio aron magpa-blotter sa mao niyang pasangil. – BANAT NEWS