Nasunogan hatagag mga bugas

CEBU - Gipasalig ni Cebu City South District Congressman Antonio Cuenco nga mohatag og sinakong bugas ngadto sa mga nasunugan diha sa barangay Basak-San Nicolas.

Dunay 50 ka sakong bugas nga ipadala ang kongresista diha sa nahisgutang barangay ugmang adlawa aron bahin-bahinon sa mga fire victim.

Ang gahin alang sa maong hinabang kuhaon ni Cuenco gikan sa iyang Priority Development Assistance Fund (PDAF).

Sila si Tisa barangay captain Eduardo Cabulao ug ang kapitan sa Mambaling nga si Rudy Estella maoy gisangunan ni Cuenco pagpang-apod-apod sa sinakong bugas.

Base sa talaan sa Department of Social Welfare and Services (DSWS) dunay 124 ka pamilya o 545 ka individual ang nabiktima sa sunog sa maong barangay niadtong Martes.

Dali hinoong nadeklarar sa konseho sa Basak-San Nicolas ingon man sa konseho sa siyudad sa Sugbu nga ubos sa state of calamity ang dapit nga nasunugan.

Tungod niini dali usab nga nahatagan og hinabang sa kagamhanan sa dakbayan ang mga fire victim human sa nahisgutang kalamidad.

Matud sa labaw sa DSWS nga si Cathy Yso nga gawas sa mga packed meals nga ilang gihatag sulod sa tulo ka adlaw, ila na usab nga napadala niini ang take home assistance.

Partikular na ang mga relief materials nga naglakip sa de lata ug bugas ingon man sa domestic materials sama sa habol, banig, mga kagamitan sa kusina ug uban pa.

 Samtang ang barangay Basak- San Nicolas nigahin na usab og kapin sa P200 mil gikan sa ilang calamity fund nga ihatag ngadto sa mga nasunugan.

 Una nang gipahibawo ni barangay kapitan George Rama nga kwarta maoy ilang ihatag ngadto sa mga fire victim aron kini dunay magamit sa ilang palitunon.

Ang labing minos P2 mil nga financial assistance sa matag pamilya gipaabot nga mahatag ngadto sa mga nasunugan pipila ka adlaw gikan karon. - BANAT NEWS