Simod sa polis gisukmag sa hubog

CEBU - Usa ka polis ang natripingan ug nasukmagan sa usa ka hubog nga nagbahis diha sa dalan C. Rosa sa barangay Camputhaw ning dakbayan niadtong milabay’ng gabii.

Arestado hinuon dayon sa maong polis nga si PO3 Romwin Matulac sakop sa Mobile Patrol Group ang hubog nga si Jorex De Los Reyes, 27, residente sa maong dapit.

Matud pa ni Matulac nga samtang miagi siya nga nagmotor sa maong dapit kalit lang siyang gibabagan ni De Los Reyes, bisan giunsa niya kini paglikay gikatahong migara hinuon kini ug nagpatunga sa dalan.

Tungod niini mihunong si Matulac apan kalit siyang giduol sa suspek dayong sukmag sa maong polis kinsa tungod sa kakalit sa hitabo nasarasay diha sa dalan.

Diha-diha mipaila si Matulac ngadto sa suspek nga siya usa ka polis ug aron unta kini dakpon apan wala gihapon kini mohunong hinungdan nga nagpasalba nalang siya makausa.

Apan bisan paman niini wala gihapon mopatuo sa maong polis ang suspek ug diha nalang kini naposasan dihang nangabot ang mga kaubanan ni Matulac.

Si Matulac nakaangkon og dakong bukol diha sa iyang simod gumikan sa maong pagpanumbag samtang si Delos Reyes gidala sa Cebu City Medical Center alang sa liquor test diin kini nasutang positibo sa ilimnong makahubog.

Si Delos Reyes dihang nahuwasan nangangkong wala siya masayod sa iyang gibuhat gumikan sa iyang kahubog apan si Matulac desididong mopasaka og kaso batok kaniya. - BANAT NEWS