'Drop bomb' nakuykuyan

CEBU - Naukay ang mga residente kagahapon sa alas 11:00 diha sa Green Valley barangay Capitol Site ning dakbayan human usa ka ‘drop bomb’ ang nakuykuyan sa mga trabahante sa tukuron untang panimalay.

Ang base control sa Mobile Patrol Group (MPG) nakadawat og tawag sa telepono labot sa maong bomba nga nakit-an sa nagtrabaho unta sa nahisgutang lugar.

Sila SPO2 Renante Nioda ug mga kaubanan sa Special Weapon and Tactics (SWAT) sa Cebu City Police Office inabagan sa mga construction workers miugkat sa maong bomba.

Nasayran nga wala pa kini makabuto ug gituuhang panahon pa sa Ikaduhang Gubat sa tibook kalibutan ug gibana-banang moabot sa 70 pound bomb ang gibug-aton ug kuyaw pa kaayong moulbo, gituuhang ihulog kini sa mga eroplanong iggugubat apan nikagar kini pagbugsok sa yuta.

Si SPO2 Nioda nga nahinabi sa Banat News nagkanayon nga mobuto pa ang maong bomba kini kun dili matarong sa pagbutang o ba kaha mapangka.

Ang maong bomba naa na karon sa SWAT alang na sa pag-dispose niini. - BANAT NEWS