CEBU - Mga habal-habal driver buot apilon sa kapolisan aron gamiton kontra krimen sa kalungsuran ug mga component cities sa Sugbu.
Kini maoy gipahibalo ni Sr. Supt. Carmelo Valmoria, hepe sa kapulisan sa lalawigan sa Sugbu, isip kabahin sa ilang programa sa “Task Group Cebu Motorsiklo” paggukod niadtong mga motor-riding criminals..
Si Valmoria nagkanayon nga nagpadayon ang ilang pagpanawat og mga volunteers nga habal-habal drivers tungod kay gituuhang dako sila og matabang sa kapulisan sa paggukod sa mga kriminal nga magmotorsiklo.
Usa sa nakitang rason ni Valmoria mao nga ang mga habal-habal drivers adlaw ug gabii naa ra sa kadalanan ug suhito sa mga hilit nga dapit sa mga kalungsoran, pipila palang kanila ang nasakop na sa Barangay Intelligence Network (BIN).
Hinuon giklaro ni Valmoria nga dili usab sila basta-basta lang nga modawat og aplikante buot moboluntaryo sa “Task Group Cebu Motorsiklo” kini tungod kay mag-agi pa kini’g makuting proseso sama sa pag-check sa ilang mga background.
Dugang niini nga kadtong ilang madawat nga mga habal-habal driver hatagan usab nila’g mga uniporme sa ingon daling ma-identify sa publiko nga mga crime volunteers. - BANAT NEWS