Tanod gipusil sa tulisan

CEBU - Usa ka barangay tanod ang napusilan sa duha ka wala mailhing mga armadong lalaking luwan sa usa ka jeep pasaheroan atol sa gihimong checkpoint diha sa dalan Echavez ug Lorega sa barangay Zapatera ning dakbayan sa milabay’ng gabii.

 Naigo sa walang bahin sa iyang dughan ang tanod nga si Mariano Calbario, 58, tanod sa nahisgutang lugar gikan sa wala matinong kalibre sa armas dihang kalit kining gipusil sa mga gikatahapan.

Base sa imbestigasyon sa Homicide Section si Calbario miapil sa gihimong checkpoint nilang PO1 Aldin Pelayo ug PO1 Rey Iligan sakop sa Pari-an Police Station sa Cebu City Police Office diha sa maong dapit kontra mga insidente sa pagpanulis sa mga sakyanang pasaheroan.

Dako ang pagtuo sa kapolisan nga posibleng mga tulisan ang mga suspek ug sa kabalakang masakpan sa ilang gidalang armas giunhan nila og pusil ang tanod nga diha magbarog sa may pultahan dayong panagan palayo sa lugar.

Ang bikima naigo diha sa dughan hinungdan sa pagkaangol niini ug pagkalandig sa Cebu City Medical Center.

Ang duha ka polis daling migukod sa mga suspek ug mipasalba sa ilang gidalang M16 Armalite aron unta sila pahunongon apan gikatahong mikaratil hinuon ang duha palayo ug nakaikyas.

Ang checkpoint gituyo og buwag-buwag sa mga polis sa usa ka dapit aron mapugngan ang tinguha sa mga magmotorsiklong kriminal nga makalusot-lusot sa mga eskina duol sa gibutangan sa mga checkpoints.

Ning bag-uhay lang ang Cebu City maoy nakatala og labing daghang kaso sa mga krimen nga may kalambigitan sa mga magmotorsiklo ug maoy nakatampo sa crime statistics sa rehiyon sumala pa sa report sa Camp Crame.

Nunot niini gilusad ang Task Force Motorsiklo sa Police Regional Office-7 aron kapugngan ang mga susamang krimen ug sukad pagkatukod niini usa ka buwan na ang nakalabay nagbunga na kini human mapatay ang tulo ka gidudahang mga tulisan apil na ang lider sa usa ka notadong criminal gang diha sa MJ Cuenco barangay Tinago niadtong milabay’ng Kalag-kalag.

Sumala pa sa mga nag-atiman kang Calbario diha sa CCMC wala pa kini maoperahi atol ning pagsulat sa balita apan giingong stable na ang kahimtang niini. - Uban sa report ni Lesley Caminade (BANAT NEWS)