Besperas sa mactan dugoon

CEBU - Nahimong dugoon ang besperas sa kapistahan sa Birhen sa Regla, dakbayan sa Lapulapu, isla sa Mactan human duha ka tawo ang gipamusil patay.

Unang gipusil mao ang usa ka Gerry Tijano, 32, minyo ug residente sa sitio Humayhumay, barangay Pajo, dakbayan sa Lapulapu ug nagtrabaho isip caddie sa usa ka golf course sa maong dakbayan.

Sila si SPO2 Rolito Jumao-as ug PO3 Jude Salazar miila sa gipasanginlang mipusil ni Tijano nga mao ang usa ka Jomar Nuñez, 40, residente usab sa maong dapit ug lumad nga taga Iligan city nga kauban nga caddie sa namatay.

Matud pa sa imbestigasyon nga sila si Tijano ug Nuñez nagkalalis gumikan sa utlanan sa yuta nga gitukoran sa tagsatagsa nila ka mga balay.

Tungod kay besperas man sa pista, pareho nga nakainom silang Tijano ug Nuñez sa dihang mi-ulbo ang panaglalis. Si Nuñez mikuha og wala matino nga kalibre sa armas ug mipusil kang Tijano tumong sa iyang ulo.Gisulayan og dala sa tambalanan si Tijano, apan gideklarar kini nga patay na sa dihang naabot. Si Nuñez dali nga naka-ikyas pagresponde sa kapolisan.

Laing gipusil sulod sa iyang panimalay ang usa ka Richard Berame Berdin alyas Phoenix, 37, nga usa ka ulitawo, nga taga purok Bayabas, barangay Canjulao, sa naasoy’ng dakbayan.

Si SPO2 Jumao-as miasoy sa Banat News nga mga alas 9:30 sa milabay’ng gabii, usa ka boto ang nabati sa igsuon ni Berdin nga si Josefina Nacaytona nga nagpuyo tupad lamang sa balay sa biktima.Si Nacaytona miasoy sa kapolisan nga wala niya panumbalinga ang boto gumikan kay besperas man sa pista ug nagtuo siya nga pabuto lamang ang miboto.

Apan ilang nakita iyang manghod kagahapon sa alas 5:30 sa buntag nga nagbuy-od na nga naligo sa kaugalingon niyang dugo.

Nasuta nga si Berdin nag-atubang og kasong arson ug pagpanunggab. Nabilanggo na kini sa New Bilibid Prison apan sa dihang nakagawas, gidunggab kini sa tawo nga iyang nadunggaban.

Nagtuo ang kapolisan nga ang mipusil patay kay Berdin naghambin og dakong kasuko niya. – BANAT NEWS