CEBU - Tungod sa bayanihong gibuhat sa usa ka 8-anyos nga batang lalaki pagsuway og luwas sa iyang manghod nga masuso dihang nasunog na ang ilang balay sa sitio Lupa sa barangay Basak-San Nicolas himuon siya karong “Kiddie Fire Marshal” sa Cebu City Bureau of Fire Protection.
Si Sr. Supt. Auloveel Ferrer ang regional director sa Bureau of Fire Protection-7 sa interview sa TV Patrol Central Visayas nga ilhon nila ang bayanihong gipakita ni Johnwel Polleros tungod sa gipakitang talagsaong kaisog niini atubangan sa kamatayon.
Si Polleros nga gi-interview sa maong balita nagkanayon nga “andam ko’ng magpakamatay alang sa akong manghod.” Bisan nakagawas na sa ilang balay si Johnwel mibalik kini sa nagdilaab nga balay tungod kay nahinumduman niya ang iyang manghod diha sa sulod nga usa pa ka tuig nga si Kaila.
Sa linghod niyang panghuna-huna kini mibutyag nga gusto niyang mamahimong bombero aron makatabang sa katawhan.
Samtang si Kapitan George Rama sa barangay Basak- San Nicolas nipadayag nga iyang iduso sa konseho sa dakbayan sa Sugbu nga mahatagan og pasidungog si Polleros.
Nakadayeg si Rama sa gihimo ni Polleros nga wala gyud manumbaling bisan paman sa mga paso nga naangkon aron lang maluwas ang iyang manghod.
Pag-abot sa ilang lawak wala na diha si Kaila tungod kay gipunit na diay kini og ilang silingan ug gidala sa luwas nga dapit.
Nasayran nga nakaangkon og first degree burn si Polleros sa iyang duha ka tiil, dunggan ug bukton ug karon nanginahanglan og salapi aron makapalit og tambal.
Gibana-banang 100 ka balay ang naugdaw sa maong hitabo nga giingong namugna tungod sa pagduwa sa tulo ka bata og posporo. – BANAT NEWS