Mga armado nanghasi sa malapascua

CEBU - Ubay-ubay na sa mga turista sa isla sa Malapascua, lungsod sa Daanbantayan ang nangabiktima sa pagpangilkil ug pagpanghasi sa mga armadong mga tawo sa kasikbit nga isla sa Kalanggaman, habig na sa lalawigan sa Leyte.

Kini ang gibutyag sa mga tour guides, dive shop operators ug mga dive masters kinsa kanunay’ng kauban sa mga turista nga mahilig sa diving sa nahisgutang gamay nga isla.

Nipadangat na sa reklamo ang mga dive shop operators ingon man mga tour guides sanglit ilang gipanalipdan ang ilang trabaho ngadto sa mga turista ug dili na nila maagwanta ang gihimo sa nagpailang gwardiya sa isla sa Kalanggaman nga armado og .38 kalibre nga armas.

Unang nipadayag sa reklamo ang mga dive masters sa Sea Explorers ug Malapascua Exotic Island Dive and Beach Resorts sa giingong pagpangayo og kwarta sa gwardiya sa isla matag dunggo sa pumpboat samtang mamahuway ang mga turista gikan sa diving.

Matud pa ni Danny Milagroso, usa sa mga tour guides, nga matag pumpboat nga modunggo pangayoan og labing minus P300 ug ang mga turista ang pabayron nga walay resibo.

Dunay higayun nga mohangyo ang taga pumpboat nga sa balik na nila bayran sanglit wala makadala og kwarta ang mga turista apan giingong gipangtionan na hinoon sila og armas niini nga makapahadlok kaayo sa mga turistang langyaw.

Napadangat na ngadto sa Department of Tourism ingon sa kagamhanan sa lalawigan sa Sugbo ang mga problema.

Matud pa ni DOT-7 Director Dawnie Roa nga sakop na sa Palompon, Leyte ang isla sa Kalanggaman.

Apan sa iyang bahin, si Bokal Agnes Magpale, chairman sa committee on tourism sa hunta probinsiyal nipadayag nga makig-alayon sa mga awtoridad sa lalawigan sa Leyte aron masanta ang kalihukan sa isla sa Kalanggaman.

Matud pa ni Magpale nga dili mahimong pasagdan ang maong insidente sanglit mga bisita sa Sugbo ang mga biktima.

Ang isla sa Kalanggaman usa sa mga dive sites nga kanunay'ng bisitahan ilabi na sa mga turista nga mopuyo sa isla sa Malapascua. – BANAT NEWS