Tanod gidakop kay nagpabuto

CEBU - Gidakop ug gi-priso ang usa ka tanod human kini gialarma sa mga pulis tungod sa iyang pagpasalba ug pagbahas bahas sa lugar diha sa barangay Lamacan lungsod sa Argao niadtong alas 6:15 sa milabay’ng gabii.

Ang gidakop sa kapulisan ug nagtingkagol na sa detention cell sa kapulisan sa Argao mao si Veronico Solis Gonzaga, 54,molupyo sa barangay Canbañua.

Matud ni PO1 Bernie Lao sa Argao Police dihang nahinabi sa Banat News dunay nagpailang concerned citizen nga nitawag sa ilang buhatan ug nisumbong bahin sa pagpasalba og armas ug pagbahas bahas sa maong tanod sa ilang dapit.

Sila si PO1 Eduardo Semilla og PO1 Von Tecson nga miresponde sa lugar nakakita sa suspek diha sa maong lugar nga nakahukas ug nagbahas- bahas ug nagpasiwil-siwil sa iyang armas nga giluklok sa tuong bahin sa iyang maong nga karsones.

Daling gisita nila ni PO1 Semilla ang suspek ug wala na kini mosukol. Nakuha diha sa iyang hawak ang paltik nga armas kalibre .38 Smith and Wesson nga dunay upat ka buhing bala sa sulod sa cylinder niini ug laing usa ka kabhang. – BANAT NEWS