Gwen 'pakanaugon' sa Kapitolyo

CEBU - Gialerto ang mga kawani ug opisyales sa Kapitolyo ingon man ang mga security guards sa miaging adlaw human makadawat og pagpanghulga gikan sa usa ka wala magpailang caller nga nanawag sa telepono ngadto sa receiving section sa governor’s office.

Unang nadawat ang tawag sa telepono gikan sa tingog sa usa ka lalaki mga alas 9:10 diha sa receiving section ug ang ikaduhang tawag diha na sa governors office pagka alas 12:13 sa udto.

Ang maong lalaki nagkanayon nga pakanaogon ang gobernadora sa iyang buhatan nga susama gihapon ang gisulti sa premirong pagpanawag niini.

Si Capitol Consultant Byron Garcia daling mipaalerto sa security sa tibuok compound sa Kapitolyo ug gipalihok ang K-9 sniffing dog aron maoy mosusi sa tanang lugar sa Kapitolyo.

Lakip sa gimanduan ni Byron ang mga guwardya diha sa parking area nunot sa maong nadawat nga pagpanghulga.

Base sa mga pag-analisar sa pipila ka mga opisyal posibleng naratol ang maong lalaking caller ug nagdali-dali kini, imbes pakanaogon ang mga kawani aron dili madamay sa maong hulga apan ang gobernadora na hinuon ang pakanaogon diha sa iyang buhatan.

Wala gyud mailhi ang maong caller sanglit ang tanang telepono diha sa Kapitolyo dili caller I.D. – BANAT NEWS