Drayber sa bombero gipusil

CEBU - Natapsingan sa bala ang bukton sa usa ka drayber sa bombero dihang gipusil kini sa tulo ka mga lalake nga nagsakay og motorsiklo didto sa barangay Damolog, lungsod sa Sogod niadtong Lunes sa alas 12:45 sa kaadlawon.

Ang biktima mao si Expidito Laurel, hingkod, minyo, nga taga Damolog, ug usa ka drayber sa trak sa bombero sa Sogod.

Samtang ang gitumbok niyang suspetsado sa pagpusil kaniya mao si   Ronilito Mondoñido, hingkod, nga taga Sitio Magdoling, barangay Sagay, lungsod sa Borbon.

Si PO3 Elymar Mendoza sa Sogod Police Station mibutyag sa Banat News nga ang biktima nagbarog sa daplin sa karsada kay nag-atang og kasakyan dihang kalit nga gihunongan sa usa ka motorsiklo nga gisakyan ni Mondoñido uban sa laing duha ka tawo.

Dihang nakita sa biktima nga milanit sa armas de fuego si Mondoñido puwerting siritag dagan niini, apan natapsingan pa sa usa ka bala sa wala hiilhing kalibre sa armas ang iyang walang bukton.

Matud pa sa biktima nga kun wala pa siya makadagan, hayan nga mabuk-an siya og bagolbagol niadtong higayona.

Ang biktima maoy positibong mitumbok kang Mondoñido nga maoy mipusil kaniya tungod kay nakaila siya niini gawas lang sa duha ka kauban niini. – BANAT NEWS