Babaye gipusposan og gu-od

CEBU - Wa na mahitsura ang nawong sa usa ka 36-anyos nga ginang human kini ligirag puspos   og gu-od sa kawayan sa iyang silingan sa luyong bahin sa eskwelahan sa Langtad Elementary School, barangay Langtad lungsod sa Argao niadtong Martes sa alas 7:00 sa gabii.

Si PO1 Eva Caminade sa Argao Police Station miila sa biktima nga si Melagros Revas, minyo, ug nagpuyo sa nahisgutang lugar.

Samtang ang suspetsado mao ang silingan sa biktima nga si Eleazar Comaling, hingkod, ug usa ka mananagat.

Si PO1 Caminade mibutyag sa Banat News nga ang biktima padulong na untang mopauli sa ila dihang giatangan kini sa suspetsado.

Sa dihang diha na duol niya ang biktima giligid kini'g puspos sa usa ka guod sa kawayan nga misangpot sa pagkagusbat sa dagway sa biktima, pisok ang walang mata ug napigsat ang mga kamot.

Apan bisan pa kun nabulit sa bun-og, nakadagan pa ang biktima ug nakapauli sa ilang balay samtang misibat usab dayon ang suspetsado.

Samtang sa laing bahin si kapitan Ariel Saragena sa barangay Langtad mibutyag sa Banat News nga panagdumot ang hinungdan sa maong hitabo.

Sa pagkakaron gipaabot sa kapolisan nga makasang-at og pormal nga kiha ang biktima batok sa suspetsado kinsa gawasnon pa sa pagkakaron. – BANAT NEWS