71 nga lola igo sa bala

CEBU - Ipaubos sa imbestigasyon ang kapolisan sa Carbon Police Station human maangol ang 71 anyos nga lola dihang naigo kini sa saag nga bala sa usa ka sakop sa “Bloods Gang” didto sa Sitio Katangkongan, barangay Sambag 1, ning dakbayan niadtong Martes sa alas 10:00 sa gabii.

 Gitataw ni Sr. Supt. Patrocinio Comendador, hepe sa Cebu City Police Office (CCPO) nga ipaubos sa paraffin test ang maong mga polis kauban sa mga barangay tanod sa Pahina Central tungod kay sila may gipabuthan sa maong kriminal.

Ang naangol giila sa kapulisan nga si Epifania Casan, nga taga Sitio Tumoy Riverside baragay Pahina Central kinsa nasabak sa tuong kilid.

Si Sr. Inspector Pablo Cabildo, hepe sa Carbon Police Station nagkanayon nga gihatdan sa iyang mga sakop og warrant of arrest si Randolf Coronel taga Sitio Tumoy, Riverside barangay Pahina Central.

Apan dihang nasabtan ni Coronel nga siya'y tuyo sa mga polis ug mga tanod, mipabuto kini sa iyang armas dayong sibat.

.Gumikan kay wala nila madakpi ang suspetsado, namalik nalang ang mga polis ug tanod sa ilang agi dihang nasugatan nila si Casan nga nagkadugo na.

Gihatod dayon kini nila sa usa ka pribadong tambalanan diin hangtod karon giatiman pa kini sa mga doktor.

Ang mga saksi mitug-an nga nakadungog sila og duha ka buto sa armas ug nakita nila si Casan nga naigo sa bala samtang nagbarog kini sa maong lugar.

Apan alang kang Comendador nga sutaon gayud niya kun wala ba kapabuto sa ilang armas ang mga polis ug mga tanod aron mawala ang pagduda sa katawhan batok sa mga otoridad. – BANAT NEWS