Tomas nagmaya sa hukom sa SC

CEBU - Gihangop ni Mayor Tomas Osmeña ang nakab-ot nga desisyon sa Korte Suprema pagpabalik sa 16 ka bag-ong mga siyudad ngadto na sa pagka-lungsod.

Miprotesta ang mga sakop sa League of Cities of the Philippines tungod kay giingong dako ang natibhang sa ilang Internal Revenue Allotment (IRA) share.

Gawas niini ang nahisgutang liga miinsister nga adunay mga bag-ong dakbayan nga wala makatuman sa gikinahanglang mga rekisitos.

Sa iyang gipadangat nga text message gipadayag ni Osmeña nga siya misaludo sa nakab-ot nga baruganan sa korte suprema.

“I truly salute the leadership of the Chief Justice in standing up to the abuses of Congress in abusing thier law-making powers,” sumala sa mayor.

Mahimo pa hinuong mosang-at og motion for reconsideration ang apektadong mga dakbayan sa hukom sa labaw'ng hukmanan.

Lakip sa naapektuhan sa desisyon sa korte suprema mao ang mga siyudad sa Naga, Carcar ug Bogo sa lalawigan sa Sugbu.

Gipadayag na hinuon ni Bogo Mayor Celestino Martinez nga sila mosang-at og kaugalingong mosyon ug moinsister sa ilang katungod.

Matud ni Martinez nga legal ang pagkahimong siyudad sa Bogo tungod kay ilang natuman ang tanang mga rekisitos nga nalatid sa balaud.

Sa susamang kalamboan, gipasalig usab ni Kongresista Eduardo Gullas nga mohimo og tukmang lakang sa desisyon sa labaw'ng hukmanan.

Nasayran nga ang kongresista sa unang distrito sa Sugbu maoy miduso og balaudnon alang sa conversion o paghimong siyudad sa Naga ug Carcar.

Ang mga mayor sa nahisgutang mga siyudad naguol ug nabalaka sa mahatag unya nga implikasyon kung mahibalik ang ilang dakbayan ngadto na sa pagka-lungsod. – BANAT NEWS