Mga estudyante nag-rally, nangayo og karsada

CEBU - Nagpahigayon og rally kagahapon sa buntag ang mga estudyante sa Ocana National High School sa dakbayan sa Carcar diin ilang giyangungo ngadto sa mga opisyal sa siyudad nga butangan og karsada ang Barangay Napo.

Matud sa maong mga estudyante nga ang karsada diha sa ilang lugar ang gipanag-iya sa mga pribadong tawo ug karon gisiradohan na kini sa tag-iya hinungdan nga mapugos sila og agi ngadto sa sapa nga nakahatag og peligro ngadto kanila panahon nga mobundak ang uwan.

Si Leonora Cabardo Mangyao, representante sa Kalangyawon Land Owners and Residence Association Inc. (KLARAI) ug Upper Kalangyawon Farmers Association Inc. (UKFAI) sa pakighinabi niini sa mga tigbalita kagahapon sa buntag mibutyag nga unom ka sitio sa Napo nga mao ang Mahayahay, Kalangyawon, Tulinda Tapon 2, Tagaytay ug Danao ang apektado sa pagkasirado sa maong karsada.

Ang nahisgutang karsada ang gigamit sa mga residente sa lugar sukad pa niadtong tuig 1980’s apan human sa eleksiyon sa barangay niadtong Oktobre 2007 gisirado na kini sa tag-iya.

Matud niini nga niadto ang tag-iya sa maong karsada ang mangayo og toll fee nga P10 sa habal-habal ug P20-P25 sa mga sakyanan nga four wheels apan niining bag-o lang wala na gyud motugot ang tag-iya sa karsada nga paagian pa kini gawas sa mga pribadong sakyanan.

Ilang giyangungo karon sa kagamhanan sa siyudad nga tabangan sila sa maong problema nga aduna sila’y maagian tungod kay ang labaw nga apektado sa maong sitwasyon ang mga estudyante.

Gibutyag ni Mangyao nga niadto duha ka mga magtutudlo nga miagi diha sa sapa sa Garay ang nangaanod.

Si Mayor Mario Patricio Barcenas sa pakighinabi niini sa mga tigbalita mibutyag nga dunay kalambigitan sa politika ang maong sitwasyon tungod kay ang kapitan karon sa Barangay Napo nga si Mario Labra ang nagkaatbang sa politika sa bana ni Julia Rodriguez kinsa usa sa tag-iya sa luna nga gihimong karsada.

Matud ni Barcenas nga ang tag-iya sa luna nga gihimong karsada ang gitanyagan na sa siyudad nga bayaran ang maong luna apan nagdumili kini.

Ang mayor midugang nga nangita na sila og paagi nga masulbad ang maong problema. - BANAT NEWS