Amazona nasikop

CEBU - Usa ka gidudahang   Amazona   kon babaye nga rebelde nasikop sa joint operations sa Criminal Investigation and Detection Team (CIDT) sa CIDG7 ug AFP Central Command niadtong Lunes sa hapon diha sa dalan 2nd floor sa Leeson Building sa dalan P. Del Rosario  ning dakbayan sa Sugbu.

Ang dinakpan giila nga si Dorothy Paraiso, 44, manager sa D’Scribe Transcriptions nga nahimutang diha sa nahisgutang lugar human malutsi og warrant of arrest sa kasong rebellion.

Sila si Chief Insp. Rogarth Campo, hepe sa Cebu CIDT ug mga kauban nga mga ahente sa Central Command misignit kang Paraiso diha sa iyang opisina human sila makadawat og report sa ilang operatiba sa presensya niini.

Ang grupo nila ni Chief Insp. Campo armado sa warrant of arrest sa kasong rebellion nga gi-isyu ni Judge Edito Enemicio sa branch 25 sa Regional Trial Court niadtong Oktobre 30 ning tuiga.

Una niini, si Paraiso nalutsan og warrant of arrest nga gi-isyu ni RTC Judge Sylva Aguirre Paderanga sa kasong multiple murder, apan si judge Enemicio miisyu og warrant of arrest nga rebellion human ang Provincial Prosecutors Office nakakita’g probable cause alang niini.

Nasayran nga si Paraiso nalambigit sa kasong multiple murder uban sa mga kaubanang rebelde may kalambigitan sa pagpangatake sa Army detachment sa Barangay Hall didto sa Sitio Siotes, barangay Caurasan, lungsod sa Carmen niadtong Disyembre 12, 2002.

Sa maong pagpangatake upat ka mga sundalo nga sakop sa 78th Infantry Battalion ang namatay nga naglangkob nila ni Sgt. Buenaventura Hora, Sgt. Eduardo Mandal, PFC Eugenio Quemado ug PFC Romy Ladrillono, samtang naangol usab ang usa ka Adriano Gonzales.

Base sa impormasyon, nga si Paraiso uban sa usa ka ginganlan og “Noy” maoy mihimo’g surveillance duha ka adlaw sa wala pa ang pagpangatake.

Gikatahong ang ubang mga kaubanan ni Paraiso mao sila si Jigger Geverola alias Porto, kinsa nabalhog karon sa karsel sa Central Command sa kasong multiple murder, human nadakpan niadtong Mayo 2004 uban kang Ronald Sendrejas ‘alias Kano” didto sa lungsod sa Carcar.

Nagtuo ang kapolisan nga si Paraiso, kauban kini ni Sendrejas, ang kanhi Secretary of Front II Committee sa Central Visayas Regional Party Committee.

Si Sendrejas gipusil patay niadtong Enero ning tuiga didto sa Tagbilaran City, Bohol, samtang nagdala unta kini og tambal sa iyang igsuon sa Gallares Hospital.

Si Sr. Supt. Guillermo Eleazar, ang regional director sa CIDG-7 mipadayag nga sa pagkakaron ila pa nga gi-check ang dugang background sa maong dinakpan kun aktibo pa ba kini sa kalihukang walhon.

Sa pagkakaron ang kasong rebellion pa maoy ilang lig-ong gihuptan batok niini nga nahimo niadtong 2002.

Ang akusado gidala na kagahapong adlawa didto sa korte sa dakbayan sa Danao aron usab mabasahan sa iyang kasong giatubang. - BANAT NEWS