Fish ban gipatuman

CEBU - Gipatuman karon sa Bureau of Fisheries and Aquatic Resources kon BFAR-7 ang temporaryong pag-ban sa pagpanguha sa pipila ka mga klase sa isda sa tibuok kadagatan dinhi sa Visayas nga peligro nang mahurot kun magpadayon ang pagpanguha niini.

Si BFAR-7 regional director Andres Boojos nibutyag nga sugod niadtong petsa 15 niining bulana pormal nilang gipatuman ang temporaryong ban sa pagpanguha sa pipila ka mga klase sa isda nga maoy sagad isulod sa mga de-lata.

Kini naglangkob sa mga klase sa isda sama sa tamban, lopoy, lawlaw, hawol-hawol, hilos-hilos, manansi ug tanang klase sa isda nga i-processed aron himuong canned goods.

Matud sa director hangtud sa petsa 15 sa bulan sa Marso sunod tuig ang maong ban subay sa administrative order 167 series of 1989 gikan sa ilang ulohang buhatan.

Gipasabot sa director nga matag tuig himuon ang temporary ban gikan pa niadtong 1989 aron paghatag og higayun nga makapamihod ang maong mga isda ug makapanganak aron mosanay.

Gitumbok sa director ang tibuok lugar sa Visayas area gikan sa Region 5 sa Masbate, Region 6 sa amihanang Iloilo ug Negros Occidental ug Oriental ingon man sa Region-7 sa amihanang bahin sa Sugbu.

Nunot niini ni-apilar ang director sa mga mananagat sa pagsunod sa maong direktiba nga gitumong ra usab alang sa kaayuhan sa panginabuhian sa mga mananagat ilabina kun modaghan pa ang maong klase sa isda sa umaabot nga mga katuigan. – BANAT NEWS