Kaso vs Gungob gitun-an: MGB-7

CEBU - Gitun-an sa Mines and Geo Sciences Bureau (MGB-7) ang pagpasaka og mga kaso batuk ni Consolacion Mayor Avelino Gungob tungod sa pagbabag niini nga mapahunong ang illegal quarry operation sa bukirang bahin sa barangay Lanipga sakop sa maong lungsod.

Gibutyag ni MGB-7 director Roger De Dios dihang na-interview sa usa ka estasyonan sa radyo makadaghan nang higayon nga giisyuhan og cease and desist order ang maong lungsod apan padayon kining ni-operate.

Miangkon si De Dios nga walay nahimo ang iyang mga sakop ingon man ang back up nga mga pulis pagdakop ug pag-hold sa duha ka dump trucks ug drayber niini nga nagkarga sa mga hinakot nga yuta niadtong Lunes human nibabag og ni-interbiner si Gungob.

Matud ni De Dios nahatagan og gratuitous permit sa probinsya sa Sugbu kaniadto ang paghakot sa mga yuta sa maong lugar tungod sa gitukod nga terminal project sa mayor diin adto dad-on isip abuno.

Apan kini gi-revoke na ni Gobernador Gwendolyn Garcia human makompleto ang mao nilang proyekto apan bisan pa niini gipadayon gihapon nila ang maong quarry operation.

Matud sa director nga dili mahimong maka-apply og laing gratuitous permit ang mayor aron mahakot paingon sa laing proyekto niini nga Civic Center and Tourism Estate tungod kay wala pa mahatagi og Environment Compliance Certificate (ECC) ang maong proyekto.

Gitug-an ni De Dios nga nadiskubrehan nila nga gi-negosyo og gipamaligya sa mayor ang mga yutang gikan sa maong quarry site ngadto sa mga molupyo sa Consolacion ug dunay ubang adto gipamaligya sa dakbayan sa Mandaue tungod kay nakadakop na sila og pipila ka dump trucks nga nagkarga og anapog sa nilabay'ng mga bulan ug giingong gikan sa maong lungsod.

Ang tag-iya sa luna nga si Fortunato Sanchez mireklamo niini ug miduso og petisyon sa korte nga nagtinguha pagbawi sa iyang gidonar nga luna nga himuong karsada tungod sa kalapasan sa ilang nasabutan tali sa kagamhanan sa Consolacion. – BANAT NEWS