CEBU - Naugdaw ang gibana-banang usa ka gatos ka panimalay human mi-ulbo ang dakong sunog kagahapon sa hapon diha sa sitio Lupa, barangay Basak San Nicolas ning dakbayan sa Sugbu.
Nadawat sa kabomberuhan ang alarma sa sunog alas 2:28 ug nakontrolar kini sulod sa usa ka oras ug duha ka minutos.
Gumikan kay nagsikit-sikit ang mga panimalay ug kadaghanan ginama sa gaay giisa ni Chief Insp. Victor Vibares ang alarma ngadto sa general alarm aron makatabang ang mga kasikbit nga lungsod ug siyudad pagpawong sa kalayo.
Si SFO2 Alicasim Espinola nga maoy fire scene investigator sa pakighinabi sa mga tigbalita base sa mga pamahayag sa mga nakasaksi diha maggikan ang kalayo sa panimalay sa usa ka Leonora Tabor kansang tulo ka mga apo gikatahong nagduwa og posporo.
Tungod kay walay hamtong nga nakakita sa sunog daling nanagan ang mga bata dali usab nga nikatap ang kalayo sa mga kasikbit nga balay hinungdan sa maong dakong sunog.
Gibana-banang mokabat sa P3 milyones ang kinatibuk-ang danyos sa maong sunog nga miugdaw sa dili mominos usa ka gatos ka panimalay ug wala hinuoy na-report nga nakalas sa hitabo.
Si Vibares nagkanayon dali niyang gipaubos sa general alarm tungod sa kakusog sa hangin ug naglisod usab sila sa pag-penetrate sa fire scene gumikan sa mga tag-as nga kural sa usa ka kongkretong panimalay.
Ang kabomberuhan gikan sa dakbayan sa Talisay ug Mandaue ingon man sa lungsod sa Consolacion lakip sa miabot aron abagan ang Cebu City BFP lakip na ang mga nagkadaiyang fire volunteer sa Filipino-Chinese Fire Brigade, Emergency Rescue Unit Foundation ug Santo Niño Fire Volunteers.
Wala hinuon makasinati og kakulang sa tubig ang kabomberuhan tungod sa kadaghan sa mga firetrucks nga nagdala niini gawas lang sa kalisod nga makaabot sa dapit ang mga fire hoses maong ilaha nalang kining gisumpay-sumpay.
Samtang usa ka sakop sa Barangay Intelligence Network nga giilang si Danilo Wamelda ang gidakop ug gibuhian ra dayon human sukmaga sa tangkugo si FO1 Aaron Derin tungod kay wala unaha ang iyang balay og pasirit og tubig. – BANAT NEWS