CEBU - Gipahimangnoan sa labaw sa Department of Public Services (DPS) sa Cebu City Hall, Engineer Dionesio Gualisa, ang iyang mga sakop nga dili mangayo og pinaskuhan.
Kini tungod usab sa nadawat nga taho ni Gualisa sa nangaging Pasko nga dunay mga metro aide ug garbage collector nga nihimo niini.
Gani niingon si Gualisa nga duna nay mga metro aide ug garbage collector nga gitaktak sa trabaho tungod sa pagpangtunol niini og mga sobre.
“Ato mang nahibaw-an nga sakop nato, nanghatag og sobre kay pasudlan og kwarta pinaskuhan kuno nila, gitangtang gyud sila sa trabaho,” sumala ni Gualisa.
Sa samang higayon nipasidaan usab si Gualisa ngadto sa mga Sugbuanon nga dili magpailad ngadto ni bisan kinsa nga mangayo og pinaskuhan.
“Naa man say uban diha nga magpakaaron-ingnon nga sakop nato magsul-ob sa atong uniporme unya manghatag og sobre, mangingilad diay,” dugang pamahayag ni Gualisa.
Nagkanayon ang labaw sa DPS nga siya walay gitugutan sa iyang mga sakop nga mangayo og bisan unsang matang sa pinaskuhan.
Matud ni Gualisa nga kung dunay manuktok sa matag panimalay nga modala sa pangalan sa ilang buhatan isumbong kini dayon sa kapulisan aron kini madakop.
Sa pikas bahin niingon si Gualisa nga sugod sa Disyembre 1, wala nay tugutan sa iyang mga sakop nga mobakasyon hangtud na sa adlaw sa Sinulog sunod tuig.
Kini aron dili magkuwang ang mga tawo nga manglimpyo sa nagkadaiyang dapit sa siyudad diin gipaabot nga modaghan usab ang mga basura sa maong panahon.
Ang DPS dunay kapin sa 200 ka mga metro aide nga manglimpyo sa kadalanan sa dakbayan ug laing kapin usab sa 200 ka mga garbage collector. - Elly Bolonos (BANAT NEWS)