CH gihatdan og bala

CEBU - Ubay-ubay nga mga bala ang gihatod kagahapong adlawa sa Arms Corporation (Armscor) Shooting Center ngadto sa Cebu City Hall alang sa mga kalihukan sa kapolisan.

Ang nahisgutang mga bala nga gipalit sa dakbayan gilangkuban sa 10 mil ka mga balang 5.56 caliber alang sa Armalite rifle ug laing 3 mil ka mga bala sa kalibre .40 nga pistola.

Si Konsehal Sylvan Jakosalem nga sakop sa Committee on Public Order and Safety sa City Council niingon nga dul-an sa P250 mil ang kantidad sa nahisgutang mga bala.

Giklaro hinuon sa konsehal nga ang hatagan sa nahisgutang mga bala mao lang kadtong mga polis sa siyudad nga na-isyuhan og armas sa kagamhanan sa dakbayan.

Ang mga bala mahimo usab nga gamiton sa mga polis alang sa ilang pagpahigayon og practice shooting.

Nagtuo si Jakosalem nga pinaagi sa napalit nga mga bala mas mabansay pa og maayo ang mga polis sa dakbayan.

“Now that they have more bullets, they will be practicing open and at the same time, mag-expect ta nga mahingigo pa sila,” dugang pamahayag ni Jakosalem.

Lakip unya sa gipaabot nga makadawat sa 13 ka boxes sa duha ka matang sa mga bala mao ang kontrobersyal nga motorcycle cops sa siyudad.

Kini tungod kay pipila ka mga polis nga sakop niini giingong na-isyuhan usab sa dakbayan og .40 caliber nga Norinco pistols ug Baby Armalites. (BANAT NEWS)