Kapitan sa Sto. Niño gilabanan sa Speed

CEBU - Nakakuha og sempatiya si Santo Niño barangay captain Pancho Ramirez Sr., gikan sa Squatters Prevention Encroachment and Elimination Division (SPEED) may kalabutan sa kasungian tali nila ug mga sakop sa Cebu Market Vendors Development Cooperative (Cemvedco).

Ang mga sakop sa Cemvedco nga gipanguluhan ni Kagawad Erwin Goc-ong sa Ermita, nagpanikad nang motukod og balik sa ilang mga stalls diha sa dalan M.C. Briones ning siyudad sa Sugbu.

Apan kusganon kining gibabagan ni Ramirez tungod sa pag-insister niini nga ilegal ang pagtukod og mga structures daplin sa karsada.

Kini bisan pa man kun gipasabot na ni Goc-ong nga temporaryo lang ang pagpahiluna sa mga vendors samtang wala pa matrabaho ang unit two sa Carbon Public Market.

Ang kapin sa 40 ka mga vendors gipahiluna diha sa dalan M.C. Briones human masunog ang unit 2 sa merkado sa Carbon pipila ka tuig na ang nakalabay.

Kini giingong boluntaryo usab nga miguba sa ilang mga estraktura pipila ka buwan na ang nakalabay dihang gitrabaho ang drainage project sa Cebu City Hall.

Apan karon nga nahuman na ang nahisgutang proyekto tinguha sa mga sakop ni Goc-ong nga motukod og balik sa ilang mga stalls sa maong lugar.

Matud ni Ramirez nga dili gusto ang mga residente ug negosyante diha sa nahisgutang dapit nga mamalik ang mga vendors sa ilang pwesto.

Midugang ang barangay kapitan nga giaprubahan usab ni Mayor Tomas Osmeña ang ilang resolusyon pagpugong sa mga vendors.

Gidasonan sa hepe sa SPEED nga si Vicente Mercado ang pagtugot sa mayor sa hangyo ni Ramirez tungod kay nakadawat usab sila og kamanduan gikan sa mayor.

“Nagpaabot lang mi og tawag sa kapitan, kay naa may kamanduan ang mayor ana nga i-clear nang maong dapit kung dunay tukurong mga illegal structures,” sumala ni Mercado. (BANAT NEWS)