Bakery gidaro og puj; 2 patay

CEBU - Duha ka mga tawo ang namatay samtang laing pito ang naangol sa dihang gidaro sa usa ka PUJ ang usa ka bakery sa sitio Maracas, Nivel Hills, barangay Lahug ning siyudad niadtong Domingo sa alas 8:05 sa gabii.

Ang dead on arrival sa tambalanan giila sa mga sakop sa traffic section nga mao sila si Bernard Delicos, 27, taga dalan Pasteur, ning dakbayan ug usa ka babaye nga gibanabanang nagpangidaron og 50-anyos apan wala gyud mailhi sa kapolisan hangtod sa pagsulat ning balita.

Nangaangol mao ang managtiayon nga sila si Joel Trangia, 44, drayber sa PUJ (GW-689) taga Lower Busay ning dakbayan, ingon man asawa niining si Endrica, 54, ang tindera sa bakery nga si Ailen Academia, 28, minyo taga Salinas extension Lahug, mga kustomer nga sila si Francisco Gungog, 30, Kenneth John Gungog, onse ka bulan nga anak ni Franscisco, taga Salinas drive, Crispiniano Pagasi, 52, La Guardia Lahug, Renelyn Cadeña, 20, Salinas Extension, Lahug.

Si PO1 Edgardo Becoy, traffic investigator nga gikahinabi sa Banat News nagkanayon nga ang drayber nga si Joel Trangia gikan kini sa ilang panimalay sa may Lower Busay nga naglawig sa iyang PUJ (17C) nga may rota sa maong dapit paingon na sa Carbon apan sa pagdulhog diha sa Maracas paingon sa JY Square, Lahug kalit lang nga wala mokupot ang brake.

Wala na makontrolar sa drayber ang manobela nga misubay sa pikas linya ug nadasmagan ang mga biktima nga milahos sa 3 Angels Bakeshop ug gidaro pa sa pag-apil ang motorsiklo nga gi-parking.

Matud pa niini nga ang namatay nga si Delicos gikatahong nagbarog kining nagtalikod nga nagkuha sa sukli samtang ang uban nga didto sa bakery nagkaon kini ug nagbarog-barog sa dihang kalit nga gidaro sa PUJ.

Dugang pa niini nga kusog kayong nagpadagan ang drayber sa maong PUJ hinungdan nga wala na gayud niini madala sa pagkontrolar ang manobela, pun-an pa sa ka dulhugon sa lugar.

“Kusog kaayong dagan sa PUJ gikan sa ibabaw unya sa ka kusog niini maayong pagkapasok sa pagdaro ngadto sa sulod sa bakery nga milahos pa ngadto sa operations niini,” sumala pa ni PO1 Becoy.

Dugang pa niini nga ang asawa sa drayber nga si Endrica ang anaa karon sa seryosong kahimtang human usab matud pa niini nga nakaangkon kini'g kadaot sa iyang ulo nga nagsige pa og suka.

Si Delicos gidali sa pagdala sa mga sakop sa Emergency Unit Foundation (ERUF) ngadto   sa Chong Hua Hospital apan gideklarar kini nga dead-on-arrival.

Ang asawa sa drayber nga si Endrica nalandig sa Vicente Sotto Medical Center, samtang amahan ug anak nga si Francsico ug Kenneth Gungog nalandig sa CCMC ug si Ailen Academia nakaangkon lang ug gamay’ng samad sa iyang kalwasan.

Ang drayber nga si Trangia boluntaryong mitahan sa iyang kaugalingon human matambali sa iyang mga bun-og sa kalawasan, samtang ang gibanan-banang 50-anyos nga tiguwang wala pa mailhi hangtod ning mga higayona.

Kasong reckless imprudence resulting to physical injuries ug reckless imprudence resulting to homicide and damage to property ang ilang ipasaka batok sa drayber. (BANAT NEWS)