CEBU - Gipaabot nga mahatag na niining adlawa ang yearend bonus ingon man ang nahabiling katunga sa cash gift sa mga kawani ug mga opisyal sa Cebu City Hall.
Apan dunay mga empleyado nga posibleng dili makadawat sa maong mga binipisyo tungod kay dunay giatubang nga imbestigasyon.
Ang Employee-Management Committee on Investigation (Emcoi) sa City Hall nipagawas og listahan sa mga kawani nga dunay pending administrative cases.
Mukapin sa 200 ka mga pangalan ang anaa sa listahan nga gipadangat sa chairman sa Emcoi nga si Attorney Joseph Bernaldez ngadto sa nagkadaiyang department head.
Nasayran nga ang maong mga kawani dunay nagkadaiyang matang sa kalapasan nga may kalabutan sa ilang pagpanarbaho ug sa personal nilang obligasyon.
Labing daghan niini anaa nadestino sa Department of Public Services, Department of Social Welfare and Services ug Department of Engineering and Public Works.
Ang mga reklamo batok sa mga empleyado naglakip ning mosunod: non-remittance of business tax payment, willful failure to just debts, lapses or negligence in their performance of duties, habitual absenteeism, absent without official leave, simple misconduct, negligence of duties, conduct grossly prejudicial to the best interest of the service, disgraceful and immoral conduct, inefficiency and incompetence, violation of reasonable office rules and regulations, non-attendance of flag ceremony ug uban pa.
Ang memorandum nga gipadangat ni Bernaldez gipasubay usab niini sa usa ka probisyon sa local budget circular no.65.
Nalatid sa nahisgutang circular nga dili pahatagan og yearend ug cash gift ang mga empleyado nga dunay giatubang nga imbestigasyon.
Gipadayag hinuon ni Bernaldez nga mahimo gihapong i-process ang nahisgutang mga benipisyo kung ang mga empleyado mangayo og certification gikan sa Emcoi. - Elly Bolonos (BANAT NEWS)