CEBU - Gipahibawo karon ni Cebu City Election Officer Marchel Sarno nga magsugod na ang continuing registration karong Lunes sunod semana (Disyembre 2).
Ang duha ka buhatan sa Cebu City Comelec nakadawat na niadtong miaging Biyernes sa Comelec Resolution Number 8514 nga giaprubahan niadtong Nobiyembre 12.
Gimando sa nahisgutang Comelec Resolution ang pagsugod na sa continuing registration sunod semana hangtud sa Disyembre 15 sunod tuig.
Gawas sa pagpang-rehistro, ang Comelec modawat usab sa transfer of registration records, reactivation, changes/corrections of entries sa registration records ug uban pa.
Karon pa lang giawhag nang daan ni Sarno kadtong mahimo nang makabotar sa umaabot nga eleksyon nga personal nga mobisita sa ilang buhatan ug magparehistro.
Kini tungod kay giingon sa election officer nga sila andam na alang sa paghatag og pagtagad niadtong gusto nga magparehistro.
Niingon si Sarno nga kadtong nagpuyo sa ubang dapit sa Sugbu ingon man usab sa ubang dapit sa nasud, muadto lang sa ilang tagsa-tagsa ka buhatan sa Comelec.
Sumala sa election officer nga ang dalhon niadtong magparehistro ngadto buhatan sa Comelec mao lang ang ilang balido nga identification card.
Kini sama sa employee’s ID, postal ID, Student’s ID, Senior Citizen’s ID, Driver’s License, NBI/PNP clearance, Passport, SSS/GSIS ID, IBP ID, PRC license ug uban pa.
Nagkanayon si Sarno nga mahimo nang magparehistro usab kadtong mag-edad og 18-anyos atol unya sa adlaw sa eleksyon sa tuig 2010.
Apan kini kinahanglang nakapuyo na sa nasud og labing minos usa ka tuig, ug mopuyo og labing minos unom ka buwan sa dapit diin kini gusto nga mobutar. - Elly Bolonos (BANAT NEWS)