Sakyanan ni Joavan hinulman ra - Soc

CEBU - Kusganong gipang-himakak ni Talisay City Mayor Socrates Fernandez nga siya dunay gitago ug wala ideklarar sa iyang Statement of Assets and Liabilities and Net Worth (SALN).

Kini taliwa sa plano karon sa nagpailang whistleblower nga si Crisologo Saavedra nga modangop na usab ngadto sa Ombudsman Visayas.

Buot ni Saavedra nga paimbestigahan sa anti graft-office si Fernandez tungod sa gikatahong wala pagdeklarar sa usa ka sakyanan sa mayor.

Ang gitumbok sa nagpailang whistleblower mao ang green Mitsubishi Pajero ni Fernandez nga gimaneho kaniadto sa anak niini nga si Joavan.

Gikataho nga si Saavedra mobisita karong adlawa sa buhatan sa Ombudsman Visayas aron sa pagpormalisar sa iyang hangyo.

Apan karon pa lang gipadayag nang daan ni Fernandez nga walay basihanan ang pagpaimbestigar ni Saavedra kaniya.

Kini tungod kay matud sa mayor, siya walay gitagoan nga butang o kabtangan ug ang tanan giingong iyang gideklarar ngadto sa anti-graft office.

Gipasabot ni Fernandez nga ang giinitan ni Saavedra nga green Mitsubishi Pajero dili iya ug igo lang gipagamit kaniya sa gitugyanan niini.

Wala hinuon ibutyag sa mayor ang tinuuray nga tag-iya sa sakyanan, apan iyang gitug-an ang gitugyanan niini ug maoy nagtugot kaniya sa paggamit sa pajero.

Usa ka Vicenta Caballero maoy giingon ni Fernandez nga gipiyalan sa sakyanan ug kini iyang gihulagway nga suod niyang higala.

Dili hinuon mopugong ang mayor kung siya paimbestigahan ni Saavedra tungod kay siya giingong dunay dokumento nga gihuptan pagmatuod nga dili iya ang sakyanan.

“Dili man gyud na ako nang pajero naa man tay pruweba ana, naa tay C.R. (certificate of registration) sa tag-iya, naay ngalan sa tag-iya,” sumala ni Fernandez.

Nasayran nga si Fernandez maoy labing kabus nga mayor sa probinsya base sa gideklarar niining SALN sa anti-graft office pinaagi sa iyang P990,450 nga net worth. - Elly Bolonos (BANAT NEWS)